पोखरा । आइतबार राति पौने ९ बजे हुने विश्वकप फुटबलको फाइनल खेल पोखराको सडकमै प्रत्यक्ष प्रशारण गर्न पोखरा महानगरपालिकाले अनुमति दिएको छ । निजी कम्पनीले पोखरा महानगरको सहकार्यमा पृथ्वीचोक र हल्लनचोकको सडकमै विश्वकपको प्रत्यक्ष प्रशारण गर्न लागेको हो ।

उक्त कार्यक्रमको प्रचार प्रसारका लागि परिचय एड्भरटाइजले पृथ्वीचोक र हललनचोकमा डिजिटल स्क्रिन राखेको छ । पोखराको पृथ्वीचोक पृथ्वी राजमार्ग र सिद्धार्थ राजमार्गको संगमस्थल हो । रातको समयमा धेरैजनाको उपस्थितिमा खेल देखाउँदा सवारी आवागमनमा असर पर्ने र दुर्घटना हुन सक्ने भन्द जिल्ला ट्राफिक प्रहरी कार्यालयले असन्तुष्टि जनाएको छ ।

‘महानगरपालिकबाटै हाम्रो नाममा पत्र पठाउँदा नै नगर्ने भनेर अब्जेक्सन जनाएका थियौं’, जिल्ला ट्राफिक प्रहरी कार्यालय प्रमुख प्रकाश शाहले भन्नुभयाे, ‘यो नगरौं ट्राफिक समस्या हुन्छ भनेर हामीले भनेको हो । महानगरले नै दिएपछि हामीलाई पनि गाह्रो भयो ।’

ट्राफिक प्रहरीले पृथ्वीचोक मुख्य राजमार्ग र बसपार्क क्षेत्रमै पर्ने भएकाले दुर्घटना निम्तिन सक्ने बताएको छ । ‘तर, हामी आदेश पालकमात्र भएकाले अनुमति पाइसकेपछि कुनै सम्भावित दुर्घटना हुन नदिन सम्पूर्ण सुरक्षाको व्यवस्था मिलाउन तयार नै छौं’, ट्राफिक प्रमुख शाहले भन्नुभयाे।

ट्राफिक प्रहरीको असन्तुष्टिको बाबजुद पनि महानगरले जिल्ला प्रशासनबाट सडकमै खेल देखाउन स्वीकृति लिएको छ । कास्कीका प्रमुख जिल्ला अधिकारी टेकबहादुर केसीले भने स्वीकृति दिएको नभई आपसी समझदारीमा विश्वकपको फाइनल खेल देखाउन लागिएको बताउनुभयाे ।

‘ठूलो टिभीमा बाटो अवरोध नगर्ने गरी, साइडसाइडबाट मात्रै हेर्ने गरी कुनै अनुमति होइन, आपसी समझदारीमा २ ठाउँमा खेल हेर्न दिएका हौं,’ सीडीओ केसीले भन्नुभयाे, ‘बेलुका एक, डेढ घन्टाको कुरा हो । ट्राफिक प्रहरी, प्रहरी सबैसँग सामान्य समझदारी भएको छ ।’

पोखरा महानगरले भने खेल देखाउनमात्रै स्वीकृति दिएको तर, कुनै सहकार्य नगरेको दाबी गरेको छ । जबकि महानगरकै आधिकारिक फेसबुक पेजमा समेत सहकार्य अंकित प्रचारसामग्री सम्प्रेषण गरिएको छ । ‘खेल देखाउन महानगरले स्वीकृति दिएको सत्य हो । तर, सहकार्य वा प्रवद्र्धकको भूमिका निभाएको भने होइन’, महानगर प्रवक्ता मोती तिमिल्सिनाले भन्नुभयाे । आज राति कतारको लुसेल स्टेडियममा हुने विश्वकप फाइनलमा फ्रान्स र अर्जेन्टिना भिड्दैछन् ।

onlinekhabar

फिफा विश्वकप

प्रकाशित मिति: आइतवार, पुस ३, २०७९, ३:५० बेलुका

लेखक: समाचारपाटी