छैटौं साहना प्रधान स्मृति राष्ट्रिय महिला हक्की प्रतियोगिता आगामी शनिवारदेखि हुने भएको छ । नेपाल हक्की संघको आयोजनामा पाँचदिने प्रतियोगिता धुलिखेलमा हुने भएको हो । प्रतियोगिताका खेलहरू काभ्रको धुलिखेल खेलकुद मैदानमा हुने तय भएको छ । सोमवार काठमाडौंमा पत्रकार सम्मेलन आयोजना गर्दै संघले प्रतियोगिताबारे जानकारी दिएको हो । प्रतियोगितामा एक विभागीय टोली त्रिभुवन आर्मीसहित सात प्रदेश वागमती, गण्डकी, लुम्बिनी, मधेश र सुदूरपश्चिम प्रदेश गरी व६ टोलीले प्रतिस्पर्धा गर्नेछन् । आयोजक हक्की संघका अध्यक्ष अनिलप्रसाद शर्माले सहभागी टोलीलाई दुई समूहमा विभाजन गरी लिगकम नकआउट आधारमा खेल हुने जानकारी दिए ।

समूहको शिर्ष दुई टोली सेमिफाइनलमा प्रतिष्पर्धा गर्नेछन् । प्रतियोगितामा शिर्ष तीन स्थान प्राप्त गर्ने टोलीले क्रमशः एक लाख, ७५ हजार र ५० हजार रुपैयाँ नगद पुरस्कार पाउनेछन् । प्लेअर अफ द म्याचलाई पाँच हजार नगद पुरस्कार प्रदान गरिने संघले जनाएको छ । विधागत उत्कृष्टअन्तर्गत डिफेन्डर, गोलरक्षक, सर्वाधिक स्कोरकर्ता र उदीयमान खेलाडी समान १० हजार नगदबाट पुरस्कृत हुने हक्की संघकी महासचिव सुवर्ण श्रेष्ठले जानकारी गराउनु भयो । महासचिव श्रेष्ठले अन्तर्राष्ट्रियस्तरको हक्की रंगशाला र प्रशिक्षण केन्द्र निर्माणका लागि धुलिखेलमा जग्गा प्राप्त भएको जानकारी दिनुभयो । धुलिखेल नगरपालिकाको वडा–१२ मा रहेको खेलमैदान उपलब्ध भएको हो । 

धुलिखेल नगरपालिकाले रंगशाला र प्रशिक्षण केन्द्र निर्माणका लागि हक्की सघंलाई दिएको महासचिव श्रेष्ठले उल्लेख गर्नुभयो । प्रदेश खेलकुद विकास परिषद्, वागमती प्रदेशले उक्त रंगशालाका लागि विस्तृत परियोजना प्रतिवेदन तयार गरिरहेको र त्यो अन्तिम चरणमा पुगेको संघको दाबी छ । संघले प्रशिक्षक तथा निर्णायकलाई समयानुकुल परिस्कृत गर्दै लाने उल्लेख गर्दै प्रतियोगिताका दौरान एशियन हक्की महासघंको सहयोगमा एएचएफ टेक्निकल अफिसियल कोर्स पनि धुलिखेलमा नै सञ्चालन गर्ने भएको छ ।

—न्युज एजेन्सी नेपाल

महिला हक्की प्रतियोगिता

प्रकाशित मिति: मङ्लबार, बैशाख ११, २०८१, १:४३ बेलुका

लेखक: समाचारपाटी