नेकपा(एकीकृत समाजवादी)का सांसद शेरबहादुर कुँवरले सर्वोच्च अदालतले रोक लगाएको निर्वाचन क्षेत्र पूर्वाधार विकास कार्यक्रम यथाशिघ्र कार्यान्वयन गर्न सरकारलाई आग्रह गर्नुभएको छ ।
बुधवारको प्रतिनिधि सभा बैठककमा बोल्दै सांसद कुँवरले सांसदहरुले विकास निर्माणको काम गर्न पाउनुपर्ने बताउनुभएको छ । उहाँले निर्वाचनमा जाँदाखेरी सांसदहरुले जनताको विचमा विभिन्न प्रतिवद्धताहरु गरेको हुने भन्दै अहिले सांसदहरुलाई विकास गर्न नपाउने भनेर हात बाँधिएको बताउनु भयो । उहाँले सर्वोच्च अदालतले निर्वाचन क्षेत्र पूर्वाधार विकास कार्यक्रम रोकेर संसदलाई अपमान र सांसदहरुलाई अपहेलित गरेको बताउनु भयो । उहाँले अदालतले संसदको अधिकार कटौती गरेको बताउनु भयो । उहाँले सो कार्यक्रम यथाशिघ्र सञ्चालन गर्न सरकारलाई आग्रह गर्नुभयो ।
उहाँले भन्नुभयो – ‘निर्वाचनमा जाँदाखेरी पनि जनताको बीचमा प्रतिवद्धता जनाएका थियौँ । यि कामहरु गर्नसक्छौँ भनेर । तर हामी सांसदहरुलाई हात बाँधेर विकास पनि गर्न नपाउने, विकास निर्माणका लागि माग पनि राख्न नपाउने तर बजेट चाहीँ हामीले पास गर्नुपर्ने । हामीले पास गर्नुपर्ने बजेटमा त्यसको स्वामित्व संसदले लिन पाउने कि नपाउने ? सांसदहरुले त्यसको अधिकारको लागि बोल्न पाउने कि नपाउने ? त्यसकारण निर्वाचन क्षेत्र पूर्वाधार विकास कार्यक्रम रोकिएको छ । यथाशिघ्र सञ्चालन गर्नका लागि, कार्यान्वयन गर्नका लागि सरकारले पहल गरोस् ।’सांसद कुँवरले संसद शक्तिशाली भएको देशमा सरकार पनि शक्तिशाली हुने भन्दै नेपालमा भने सांसद र संसदीय व्यवस्थालाई अपमान गर्ने होडबाजी चलेको बताउनु भयो ।
—न्युज एजेन्सी नेपाल