काठमाडौं । उपप्रधानमन्त्री श्रेष्ठ र भारतीय राजदुतद्वारा कमलविनायक–नगरकोट सडक अनुगमन
उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठ र नेपालका लागि भारतीय राजदुत नवीन श्रीवास्तवसहितको टोलीले भक्तपुरको कमलविनायक–नगरकोट सडकखण्ड अनुगमन गरेको छ ।
उपप्रधानमन्त्री एवं भौतिक पूर्वाधार तथा यातायातमन्त्री नारायणकाजी श्रेष्ठ र नेपालका लागि भारतीय राजदुत नवीन श्रीवास्तवसहितको टोलीले भक्तपुरको कमलविनायक–नगरकोट सडकखण्ड अनुगमन गरेको छ ।
बिहीवार मन्त्री श्रेष्ठ र नेपालका लागि भारतीय राजदुत श्रीवास्तवसहितको टोलिले उक्त सडकखण्डको स्थलगत अनुगमन गरेको हो । स्थलगत अनुगमन पश्चात पत्रकारसँग प्रतिक्रिया दिँदै उपप्रधानमन्त्री श्रेष्ठले सडक निर्माणमा ढिलाइ भएको विषयमा निर्माण कम्पनीसँग स्पष्टीकरण माग्नुभयो । उहाँले निर्माण कम्पनीले आगामी चैत मसान्तसम्म सबै काम सम्पन्न गर्न निर्देशन पनि दिनुभयो । उहाँले ठेकेदारको उपेक्षाको कारण कमलविनायक–नगरकोट सडक मर्मत अलपत्र परेको भन्दै अब सरकारले नसहने बताउनु भयो ।
उहाँले ठेकदार कम्पनीलाई कालोसूचिमा राखेर मात्रै समस्या समाधान नहुने बताउनु भयो । उहाँले नेपालको सडकहरुको हालको अवस्था देख्दा मलाई धेरै दुख लाग्ने बताउनु भयो । उहाँले नेपालको विभिन्न प्रकारको भुगोललाई जोड्ने मुख्य आधार भनेको सडक पूर्वाधार नै भएको बताउनु भयो । उहाँले सरकारले सडक बाहेक रेल,केवलकार जडानमा वृद्धि गर्ने ,काठमाडौं भित्र मेट्रो रेल जोड्ने र हवाई उडान सेवा बढाउने प्रयास गरिरहेको बताउनु भयो । उहाँले अब सडक निर्माणको काम समयमा नै निर्माण सम्पन्न गर्न र सुधार गर्न मन्त्रालयले नेतृत्व लिने बताउनु भयो । उहाँले सडक बनाउने ठेकेदारको कुनै सम्बन्धसँग सरोकार नभएको बताउनु भयो । उहाँले प्रधानमन्त्रीसँग जे सम्बन्ध भएपनि हामीलाई सम्बन्ध नभएर काम गर्ने बताउनु भयो । उहाँले प्रधानमन्त्री आफैँ माथि पनि अन्याय भइरहेको बताउनु भयो । उहाँले निर्माण कम्पनीले भक्तपुर–नगरकोट सडकको निर्माणमा उपेक्षा गरेको बताउँदै यसै गरी अल्झाउने, काम सम्पन्न नगर्ने र समयमै गुणस्तरीय काम गरेर हस्तान्तरण नगरे अब थप समय नदिने उनले बताउनु भयो ।
मन्त्री श्रेष्ठले योे सडक निर्माण सात पटक म्याद थप भइसकेको र बीचमा क्रसर उद्योगको समस्या आएकाले गत जनवरीमा एक महिना थप समय दिएको भन्दै अब कुनैपनि बाहनामा समय थप नहुने बताउनु भयो । उहाँले तत्कालै निर्माण कम्पनीसँग छलफल गरी समीक्षा गर्ने र थप निर्णय लिने बताउनु भयो । मन्त्री श्रेष्ठले यसअघि नै काठमाडौँका रुग्ण आयोजनाबारेमा निर्माण व्यवसायीसँग छलफल गरेको स्मरण गर्दै त्यतिबेला पनि समयमा काम नसक्ने निर्माण व्यवसायीलाई चेतावनीसमेत दिएको बताउनु भयो । उहाँले निर्माण व्यवसायीले नयाँ सडक थप्दै जाने र पुराना सम्झौता भएका सडक अलपत्र पार्दै जाने कार्य अब दोहरिन नहुने बताउनु भयो ।
उहाँले भन्नुभयो,‘नेपालको सडकहरुको हालको अवस्था देख्दा मलाई धेरै दुःख लाग्छ । अहिलेको अवस्थामा नेपालको भुगोललाई जोड्ने पूर्वाधारको प्रमुख माध्यम सडक नै हो । सरकारले सडक बाहेक रेल,केवलकार जडानमा वृद्धि गर्ने प्रयत्न गरिरहेका छौं । काठमाडौं भित्र मेट्रो रेल जोड्ने प्रक्रियामा छौं । अन्य हवाई उडान सेवा बढाउने प्रयास रहेको छ । तर मुलभुत रुपमा जसले जे भने पनि सडक पूर्वाधार नै सबै भन्दा राम्रो हो । त्यस कारण अहिले जुन हालतमा सडक रहेका छन् । यसरी हुँदैन । हाम्रो एप्रोजमा आत्मसमिक्षा गर्न आवश्यक रहेको छ । अन्य बाटो थप्दै जाने भएको बाटो सुधार नगर्ने अवस्था रहेको छ । अब जनतालाई राम्रो बाटो दिनुपर्छ । योजनाका साथ काम शुरु गर्छौं । त्यसपछि जे जति परिवर्तन गर्न सकिन्छ । सडक निर्माण गर्ने कामको मन्त्रालयले नेतृत्व लिन्छ । यसलाई हामी परिवर्तन गर्छौं ।’
त्यस्तै, सैलुङ कन्स्ट्रक्सनका प्रतिनिधि अनुप अधिकारीले बीचमा रुख कटान, विद्युतको पोल सार्न समस्या आएको र भूकम्पका कारण पनि केही ढिलाइ भएपनि अबको एक महिनामा आयोजना सम्पन्न गरेर हस्तान्तरण गरिने बताउनु भयो । उहाँले अब फेरि पनि म्याद थपिदिनुस् भन्ने ठाउँ नभएको भन्दै अबको एक महिना रातदिन नभनी काम गरेर सम्पन्न गरेर हस्तान्तरण गर्ने र नसके छाड्ने बताउनु भयो ।
उक्त सडक आयोजनामा भारतीय एक्जिम बैंकको पनि आर्थिक सहयोग रहेकाले स्थलगत अनुगमन टोलीमा भारतीय राजदुत श्रीवास्तव पनि सहभागी हुनुभएको हो । अनुगमन टोलीमा भौतिक पूर्वाधार तथा यातायात मन्त्रालयका सचिव, सडक विभागका डिजी, सम्बन्धित आयोजना प्रमुख, ठेक्का पाएका निर्माण कम्पनीका प्रतिनिधि पनि रहेका छन् । टोलीले कमलविनायक, भत्केको पाटीदेखि नगरकोटसम्मै पुगेर सडकको स्थलगत अनुगमन गरेको हो । सैलुङ कन्स्ट्रक्सनले कमलविनायक–नगरकोट सडकखण्ड ठेक्का पाएको छ । तर पटक–पटक म्याद थप्दा पनि काम सम्पन्न हुन सकेको छैन । सडक निर्माणमा भएको ढिलासुस्तीका कारण जनताले वर्षौंदेखि सास्ती खेपिरहेका छन् ।