विराटनगर । मोरङको बेलबारीमा बुधबार बिहान यात्रुबहाक बसको ठक्करबाट साइकलयात्रीको मृत्यु भएको छ। साइकलमा सवार अर्का एक जना घाइते हुनुभएकाे छ।

पूर्व–पश्चिम लोकमार्गअन्तर्गत बेलबारी नगरपालिका–१ मा ना ५ ख ६९४२ नम्बरको बसले एकैपटक दुईवटा साइकललाई ठक्कर दिँदा बिहान ६:३० बजेतिर दुर्घटना भएको हो।

दुर्घटनामा साइकलयात्री बेलबारी–२ का १९ वर्षीय लेखनाथ चौहानको मृत्यु भएको मोरङ ट्राफिक प्रमुख प्रहरी निरीक्षक राजकुमार कार्कीले जानकारी दिनुभयाे। उहाँका अनुसार गम्भीर घाइते चौहानलाई उपचारका लागि विराटनगरको नोबेल शिक्षण अस्पताल ल्याइपुर्‍याउनासाथ चिकित्सकले मृत घोषित गरेका हुन्।

बसको ठक्करबाट अर्को साइकलका यात्री बेलबारी–२ का १८ वर्षीय राम बस्नेत घाइते हुनुभएकाे छ। बस्नेतको नोबेलमै उपचार भइरहेको छ।

बस र चालक स्याङ्जाको आँधीखोला गाउँपालिका–२ का ३८ वर्षीय नरेन्द्र दर्जीलाई नियन्त्रणमा लिएर प्रहरीले घटनाको अनुसन्धान सुरु गरेको छ।

पक्राउसाइकलयात्री

प्रकाशित मिति: बुधबार, फाल्गुन १०, २०७९, १०:१६ बिहान

लेखक: समाचारपाटी