'छानविन समिति बनाउन किन आपत्ति':-डा. प्रकाशशरण महत

नेपाली काँग्रेसका प्रवक्ता डा. प्रकाशशरण महतले इलाम निर्वाचन क्षेत्र नं. २ मा काँग्रेसको तर्फबाट उम्मेदवार (बुधवार) टुंगिने बताउनुभएको छ ।

बुधवार नयाँ बानेश्वरस्थित संघीय संसद भवनमा सञ्चारकर्मीहरुसँग कुराकानी गर्दै प्रवक्ता महतले इलाम क्षेत्र नं. २ को उपनिर्वाचनका लागि नेपाली काँग्रेसले आजै(बुधवार नै) उम्मेदवार तय गर्ने बताउनुभएको हो । उहाँले अब उम्मेदवार चयन गर्न ढिला गर्नु आवश्यक नभएको बताउनु भयो । त्यस्तै उहाँले नेपाली काँग्रेसजस्तो संसदीय मर्यादामा चल्ने अरु कुनै पार्टी नभएको बताउनु भयो । उहाँले राष्ट्रिय स्वतन्त्र पार्टीका सांसदहरुले ठूला ठूला कुरा गरेपनि उहाँहरुलाई कुनै मर्यादाको बारेमा थाहा नभएको बताउनु भयो ।
उहाँले भन्नुभयो – ‘धेरै ढिलो गर्ने काम छैन । आज टुंगिन्छ । नेपाली काँग्रेसजस्तो संसदीय मर्यादामा चल्ने पार्टी कुनैपनि छैन । अहिलेसम्मको संसदीय इतिहासको रेकर्डलाई हेरे हुन्छ । उहाँहरुलाई न संसदीय व्यवस्थाको अनुभव छ । उहाँहरु ठुला ठुला कुरा गर्नुहुन्छ । उहाँहरुलाई कुनै मर्यादाको बारेमा थाहा छैन । हामीले कुनैपनि विषयमा प्रश्न उठ्नेबित्तिकै राजीनामा दिएको इतिहास छ । उहाँ स्पष्ट रुपमा संलग्न हुनुहुन्थ्यो सहकारी प्रकरणमा । स्पष्ट देखिएको छ । हामीले त राजीनामा पनि भनिराखेका छैनौँ । छानविन समिति बनोस् । छानविन समितिले जे निष्कर्ष निस्किन्छ, उहाँ दोषि देखिनु भयो भने त्यसबेला राजीनामा हो । त्यसकारण छानविन समिति बनाउन किन आपत्ति ? यो नगर्नुको कारण के स्पष्ट छ भने उहाँको संलग्नता छ ।’
प्रवक्ता महतले गृहमन्त्री रवि लामिछानेको सहकारी ठगि प्रकरणमा संलग्नता भएका कारण संसदीय छानविन समिति बनाउन तयार नभएको बताउनु भयो ।

—न्युज एजेन्सी नेपाल

नेपाली काँग्रेसप्रवक्ता डा. प्रकाशशरण महत