काठमाण्डौं । विभिन्न कलाकारले आफ्ना चर्चित गीतहरु सुनाएर दर्शकको मन जितेका छन् । नेपाल संगीत तथा नाट्य प्रज्ञा प्रतिष्ठान कर्मचारी संघले प्रतिष्ठानकै नक्साल स्थित भवनमा आयोजना गरेको साँस्कृतिक कार्यक्रममा कलाकारहरुले आफ्नो गीत सुनाएर प्राज्ञहरु तथा कर्मचारीको मन जितेका हुन् । प्राज्ञहरुले ठुलो बजेटमा साँस्कृतिक कार्यक्रम गर्दै आएको बेला कर्मचारीहरुले आफैंले पैसा उठाएर साँस्कृतिक कार्यक्रम गर्दै प्राज्ञहरुलाई उदाहरण देखाएका छन् ।

कार्यक्रममा गायक विपिन घिमिरे र गायिका शिला बिष्टले देउडा देखि आधुनिक भाका सुनाउनुभयाे । उहाँहरुले युगल रुपमा दुई वटा गीत प्रस्तुत गर्नुभएकाे थियाे । यस्तै गायक शिशिर योगीले सारँगी त सहित अन्य गीत प्रस्तुत गरेर दर्शकको मन जित्नुभयाे ।

यस्तै लोक गायक बिमलराज क्षत्रीले बुट्टे रुमाल गीत गाउँद दर्शकले तालीले साथ दिए । उहाँले कार्यक्रममा अन्य गीत पनि प्रस्तुत गरेका थिए । यस्तै सो प्रतिष्ठानका कर्मचारीले पनि कार्यक्रममा नृत्य एवम् कविता, गजल प्रस्तुत गरे । कर्मचारी लाम्च्युङ लामा तामाङले राष्ट्रिय भावको गीतमा नृत्य गर्नुभयाे भने कर्मचारी विजय श्रेष्ठले मलाई लाज लाग्छ शिर्षकमा कविता सुनाउनुभयाे । प्राज्ञ परिषद सदस्य धिरेन्द्र प्रेमर्षीले प्रस्तुत गरेको गजलमा सबैले वाहवाही गरे । यस्तै ध्रुव वाग्लेले सुनाएको कविता पनि आकर्षक थियो ।

कार्यक्रममा सो कर्मचारी संघका सदस्य नेत्रबहादुर भुजेल, नेपाल प्रज्ञा प्रतिष्ठान कर्मचारी संघका अध्यक्ष अशोक चौरसियालगायतले प्रतिष्ठानमा कर्मचारीको दायित्वबारे आफ्नो भनाई राख्नुभएकाे थियाे । नेपाल प्रज्ञा प्रतिष्ठानको अहिलेको परिषदले आफ्नो कार्यकाल सकेर पनि कानून विपरित कार्यक्रम गरेको चौरसियाले बताउनुभयाे ।

नेपाल संगीत तथा नाट्य प्रज्ञा प्रतिष्ठानका सभा सदस्य प्रदीप बमजनले प्रतिष्ठानमा कर्मचारीको योगदानबारे प्रकाश पार्नुभयाे भने सदस्य सचिब श्याम प्रकाश तमोटले कर्मचारी र परिषदको समन्वयले मात्र प्रतिष्ठान अघि बढ्ने बताउनुभयाे । सो कार्यक्रम आयोजक तथा नेपाल संगीत तथा नाट्य प्रज्ञा प्रतिष्ठान कर्मचारी संघका अध्यक्ष हिलारी बन्धु भुजेलले नाट्य संगीतको विकाशमा कर्मचारीको पनि योगदान रहेको जिकिर गर्नुभयाे । कलाकारहरुलाई प्रोत्साहन गर्न आफुहरुले विविध साँस्कृतिक कार्यक्रम आयोजना गरेको पनि उहाँले प्रकाश पार्नुभयाे ।

यस्तै सो प्रतिष्ठानका कुलपति नारायण भक्त श्रेष्ठ (रायन)ले प्रतिष्ठानले गर्नु पर्ने साँस्कृतिक कार्यक्रम कर्मचारीले गरेकोमा सो कार्यको प्रशँसा गर्नुभयाे । प्रतिष्ठानलाई अघि बढाउन र परिषदलाई मार्गदर्शन दिन प्रतिष्ठानका कर्मचारीको पनि त्यत्तिकै ठुलो योगदान रहने उहाँले बताउनुभयाे ।

प्रकाशित मिति: मङ्लबार, पुस ५, २०७९, ३:४६ बेलुका

लेखक: समाचारपाटी