दाङ । एमालेको महासचिव बनेपछि शंकर पोखरेलका लागि यो आम चुनाव प्रतिष्ठाको विषय थियो । तर गृहजिल्ला दाङका संघ प्रदेश गरी सबै निर्वाचन क्षेत्रमा एमाले हार्न पुगेको छ । दाङमा प्रतिनिधिसभाका तीन र प्रदेशसभाका ६ वटा निर्वाचन क्षेत्रमा एमालेलाई हराउँदै गठबन्धनले जित निकालेको हो ।

प्रभावशाली नेता र भविष्यको प्रधानमन्त्रीका सम्भावित आकांक्षीमध्ये एक ठानिनुभएका स्वयं महासचिव पोखरेल पनि दाङ २ बाट गठबन्धनकी उम्मेदवार रेखा शर्मासँग झिनो मतअन्तरले पराजय हुनुभयाे ।

माओवादी केन्द्रकी रेखा शर्मासँग १९६ मतले पराजित हुँदा शंकरले २६ हजार ६८१ मत ल्याउनुभयाे । रेखाले भने २६ हजार ८७७ मत ल्याउनुभयाे ।

महासचिव पोखरेलको यो हारले राष्ट्रिय राजनीति तरंगित भएको छ । महासचिवको हारसँगै पहिलो शक्ति बन्ने दाबी गर्दै आएको एमालेभित्र पनि सन्नाटा छाएको छ ।

निर्वाचनमा होमिदै गर्दा पाँच दलीय गठबन्धन हराउँदै महासचिव पोखरेलसहित सबै क्षेत्रमा जित निकाल्ने एमालेको दाबी थियो । तर दाङका प्रतिनिधिसभा र प्रदेशसभाको निर्वाचन क्षेत्रमा एमालेलाई गठबन्धन भारी पर्‍यो । फलतः एमालेले सबै निर्वाचन क्षेत्रमा हार व्यहोर्नु पर्‍यो ।

दाङका प्रतिनिधिसभा र प्रदेशसभा गरी ९ वटा निर्वाचन क्षेत्रमा गठबन्धन दलका उम्मेदवार विजयी हुनुभयाे । दाङ–१ को प्रतिनिधिसभा सदस्यमा एमालेका शान्ता चौधरीलाई ५ हजार ८४ मत अन्तरले हराउँदै नेकपा एकिकृत समाजवादीका मेटमणि चौधरी विजयी हुनुभएकाे छ । मेटमणिले २६ हजार ५६३ मत ल्याउँदा शान्ताले २१ हजार ४७९ मत पाउनुभयाे ।

दाङ– ३ मा पनि एमालेकी कोमल वलीलाई हराउँदै कांग्रेसका दीपक गिरी विजयी हुनुभयाे । उहाँले नेकपा एमालेकी उम्मेदवार कोमल वलीलाई ७ हजार ८१० मतान्तरले पराजित गर्नुभयाे । गिरीले ३६ हजार ८४२ मत पाए भने ओलीले २९ हजार ३२ मत पाउनुभयाे । तीन वटै निर्वाचन क्षेत्रमा परिणाम गठबन्धन सामु एमाले कमजोर देखिन्छ ।

प्रदेशसभा तर्फ पनि गठबन्धनका सबै उम्मेदवार विजयी भएका छन् । दाङ–१ कै प्रदेश ‘क’ मा एमालेका गंगाराम भट्टराईलाई हराउँदै माओवादीका इन्द्रजित थारु विजयी हुनुभएकाे छ । प्रदेशसभा ‘ख’ मा पनि गठबन्धनका कुलबहादुर केसीलाई हराउँदै कांग्रेसका अनुराग खड्का विजयी हुनुभएकाे छ ।

दाङ– २ का प्रदेशसभाका दुवै क्षेत्रमा गठबन्धन विजयी भएको छ । प्रदेश ‘क’ नेकपा एमालेका बलीभद्र रानालाई हराउँदै कांग्रेस राजु खनाल विजयी हुनुभयाे । प्रदेश ‘ख’ पनि एमालेका गिरिराज केसीलाई पराजित गर्दै कांग्रेसका प्रचण्डविक्रम न्यौपाने गुन्टु विजयी हुनुभयाे ।

दाङ–३ ‘१’ र ‘२’ मा पनि गठबन्धनले एमालेका उम्मेदवारलाई हराए । प्रदेशसभा ‘क’ मा एमालेका घनश्याम पाण्डेलाई हराउँदै कांग्रेसका डिल्लीबहादुर चौधरी विजयी हुनुभयाे भने प्रदेश ‘२’ एमालेका हुकुम बस्नेतलाई हराउँदै धनबहादुर ‘मास्की’ विजयी हुनुभयाे । यसले दाङमा एमाले पत्तासाफ हुने देखाउँछ ।

source:-onlinekhabar

dangShankar Pokharelनेकपा एमाले

प्रकाशित मिति: शुक्रबार, मंसिर ९, २०७९, १२:२२ बेलुका

लेखक: समाचारपाटी