नेपाली काँग्रेसका सांसद प्रदीप पौडेलले प्रधानमन्त्री पुष्पकमल दाहाले एक वर्षभित्र तेस्रो पटक विश्वासको मत लिएर अस्थिरता देखाएको बताउनुभएको छ । 

बुधवार प्रतिनिधि सभा बैठकपछि सञ्चारकर्मीहरुलाई प्रतिक्रिया दिँदै सांसद पौडेलले प्रधानमन्त्री अस्थिर भएको बताउनुभएको हो । उहाँले एक वर्षमा तीन पटक विश्वासको मत लिएर प्रधानमन्त्री अस्थिरताको पक्षपाति भएको बताउनु भयो । उहाँले गठबन्धनहरु प्रधानमन्त्रीको कारण नभइ अरुको कारणले टुट्नुपर्ने भएपनि नेपालमा भने प्रधानमन्त्रीकै कारण गठबन्धनहरु टुट्ने गरेको बताउनु भयो । उहाँले वर्तमान सत्तारुढ गठबन्धन पनि धेरै समय स्थिर नहुने बताउनु भयो । उहाँले यस प्रकारले सरकार बन्ने र भत्किने प्रक्रियाले देशलाई स्थिरता नदिने बताउनु भयो । 

उहाँले भन्नुभयो – ‘प्रधानमन्त्रीज्यूले एक वर्षभित्र तेस्रो पटक विश्वासको मत लिनुभएको छ । एक वर्षमै तीन पटक विश्वासको मत लिनुपर्ने भएपछि प्रधानमन्त्री नै स्थिर भएको देखिएन । अस्थिरताको पक्षपाति नै प्रधानमन्त्री हुनुभएको जस्तो देखिएको छ । र गठबन्धनको नेतृत्व गर्ने सन्दर्भमा प्रधानमन्त्री सफल देखिनु भएको छैन । खासगरी के हुन्छ भने गठबन्धनमा नेतृत्व गरेको दलले अथवा प्रधानमन्त्रीको कारणले गठबन्धन टुट्दैन । गठबन्धनमा आवद्ध अरुको कारणले गठबन्धन टुट्ने गर्छ । तर अहिले र यो भन्दा अगाडी के भएको छ भने प्रधानमन्त्री जो सरकारको नेतृत्व गर्नुहुन्छ, गठबन्धनको नेतृत्व गर्नुहुन्छ, उहाँकै कारणले गठबन्धन पटक–पटक तोडिएको छ । भत्किएको छ । त्यसकारण यो धेरै स्थिर हुन्छ भन्ने मलाई लाग्दैन । सरकार बन्ने, भत्किने जुन खालको प्रक्रिया छ यसले देशलाई स्थिरता दिदैनँ । हामीले यो संविधानलाई बचाउन, समृद्धि ल्याउन सक्दैनौँ । त्यसकारण हाम्रो शुभकामना के हो भने पुष्पकमल दाहालले अहिले जुन विश्वासको मत प्राप्त गर्नुभएको छ, अरुले भत्काउने कोसिस गरेपनि उहाँले गठबन्धनको नेतृत्व इमान्दारीपूर्वक गरेर आफुलाई टिकाउने कोशिस गर्नुस् । त्यसमा हाम्रो शुभकामना छ । अब यो भत्किने प्रयास त भइ नै रहन्छ ।’ 
सांसद पौडेलले वर्तमान गठबन्धनको नेतृत्व इमान्दारीपूर्वक गरेर आफूलाई टिकाउन प्रधानमन्त्रीलाई आग्रह गर्नुभयो । —न्युज एजेन्सी नेपाल

सांसद प्रदीप पौडेल

प्रकाशित मिति: बिहिबार, चैत्र १, २०८०, २:२९ बेलुका

लेखक: समाचारपाटी