सरकारको नेतृत्व गरिरहेको नेकपा (माओवादी केन्द्र) का उपमहासचिव वर्षमान पुनले सरकारले भ्रष्टाचारमा संलग्न जोकोही पनि छोड्न नहुने बताउनुभएको छ ।

उपमहासचिव पुनले प्रधानमन्त्री पुष्पकमल दाहाल, गृहमन्त्री नारायणकाजी श्रेष्ठलाई आफूले पार्टी भित्रकै नेता भएपनि भ्रष्टाचारमा संलग्नहरुलाई कारबाहीको दायरामा ल्याउन बारम्बार दबाब दिने गरेको जिकिर समेत गर्नुभयो । पार्टी निकट श्रमिक संगठन अखिल नेपाल ट्रेड युनियन महासंघले मंगलवार काठमाडौंमा आयोजना गरेको एक कार्यक्रममा बोल्दै उहाँले भ्रष्टाचार नियन्त्रण गर्ने नाममा राज्य शक्तिको दुरुपयोग नगर्न पनि सरकारलाई सचेत गराउनु भयो । निर्दोष कोही पनि नपरुन्, दोषी कोही पनि नउम्किने गरी सरकारले सुशासनको क्षेत्रमा काम गर्नुपर्ने उपमहासचिव पुनको भनाई थियो । उपमहासचिव पुनले कुनैपनि नागरिकको सामाजिक छवि नै सिद्धिने गरी आरोपित गर्ने काम नगर्न पनि सरकारको गम्भिर ध्यानाकर्षण गराउनु भयो । 
उहाँले भन्नुभयो, ‘अहिले सुशासनको कुरा उठेको छ । सुशासनमा अलिकति बेथितिहरुमाथि प्रहार भएको छ । तर यसमा सरकारलाई हामीले पनि बारम्बार भनिराखेका छौं कि त्यसमा दोषी मान्छेहरुको कोही पनि नउम्किउन, निर्दोष मान्छे एक जना पनि नपरोस् । राज्यको शक्ति एकदम संयमित हुनुपर्ने हुन्छ । राज्यको शक्ति व्यक्तिका लागि, नागरिकका लागि, संगठनको लागि ईमेज सिद्धिन्छ, भविष्य सिद्धिन्छ । परिवार सिद्धिन्छ । सामाजिक सम्बन्ध सिद्धिन्छ एउटा सानो आरोपले ।  राज्यले आरोप लगाउनु अगाडि धेरै सोच्नुपर्ने हुन्छ । त्यसो हुँदा राज्य कोहीप्रति पनि लक्षित जस्तो देखिनु हुन्न । राज्यसत्ता, राज्यको शक्ति  प्रतिपक्षतिर, सत्ताका गठबन्धनभित्र वा पार्टी भित्र, यस्तो जस्तो देखियो भने त्यसले अस्वस्थ, अमर्यादित खालको शक्ति दुरुपयोगको खतरा हुन्छ । त्यसैले हामीले बारम्बार प्रधानमन्त्रीजी, गृहमन्त्रीजी र सबै साथीहरुलाई भनिराखेका छौं—हामी कोही पार्टीकै नेता होउला । कोही नेताका परिवार होलान् । या कोही नजिकको साथी होला । यदी दोषी देखिन्छ भने कसैलाई छोड्नु हुँदैन । अरुअरु तिर होइन, पहिला आफूतिर हेर्ने हो । तर, निर्दोष छ भने त्यो भिक्टिम हुनु हुँदैन ।’

त्यस अवसरमा पूर्व अर्थमन्त्री समेत रहनुभएका पुनले मुलुकमा आर्थिक गतिविधि बढाउन पनि वैदेशिक ऋण भित्र्याउनुपर्ने बाध्यात्मक अवस्था रहेको पनि स्मरण गराउनु भयो । 

भ्रष्टाचारवर्षमान पुन

प्रकाशित मिति: बुधबार, भदौ २०, २०८०, १:०४ बेलुका

लेखक: समाचारपाटी