राष्ट्रिय खेलकुद परिषद् (राखेप) का सदस्यसचिव टंकलाल घिसिङले नेपाली खेलकुदको सरोकारवाला निकाय राखेपले प्रश्ताव नै नगरेको वा जानकारीमा नै नभएको शिर्षक बजेटमा समावेश भएर आउने गरेको बताउनुभएको छ । 

राखेपद्वारा मंगलवार आयोजित खेलकुदमा योजना र बजेट कस्तो ? भन्ने शिर्षकमा भएको अन्तरक्रिया कार्यक्रममा सदस्यसचिव घिसिङले उक्त दुःखेसो गर्नुभएको हो । राखेपले नबनाएको योजना, परिकल्पना, प्रश्ताव बजेटमा समावेश हुँदै आएको गलत प्राक्टिस सामना गर्नुपरेको सदस्यसचिव घिसिङको भोगाइ छ । खेलकुदमा यसैपनि थोरै बजेट हुने र त्यसमा पनि कार्यक्रमहरू गर्न आफ्नो नियन्त्रणमा हुने नगरेको बजेट आउनुले समस्या भइरहेको उहाँको बुझाइ छ । 

उहाँले खेलकुदको निकायसँग प्राविधिक जानकारी बिना नै रंगशालामा बनिरहेको भन्दै चर्को आलोचना गर्नुभयो । सम्बन्धित खेलविज्ञ, खेल संघ या सरोकारवाला निकायसँग नै छलफल नगरी मापदण्डविपरीत केही संरचना बनिरहेको उल्लेख गर्नुभयो ।  खेलकुद संरचना बन्नु राम्रो पक्ष भएपनि त्यसको प्राविधिक पक्षबारे चेकजाँच गराएर मात्र संरचना बनाउन आग्रह गरेका छन् । सदस्यसचिव घिसिङले सातै वटा प्रदेशमा भएका भौतिक पूर्वाधारको अवस्थाबारे परिषद्ले मूल्यांकन गरिरहेको उल्लेख गर्दै त्यसको स्तरोन्नती र संरक्षणका लागि स्थानीय निकायलाई सहभागी गराउने गरी योजना बनिरहेको बताउनु भयो । परिषद्ले आफैँले राख्नुपर्ने संरचना बाहेक अधिकांश संरचना स्थानीय निकायलाई सुम्पिने उनले बताउनु भयो । 

उहाँले खेल्ने मैदान या कभर्डहल बनाउनुभन्दा पनि ठूलाठूला रंगशाला निर्माण गर्न होड बाजी भइरहेको उल्लेख गर्दै त्यसलाई रोक्न आवश्यक रहेको बताउनु भयो । प्रत्येक नगरपालिका या वडामा पनि स्टेडियमभन्दा पनि ट्रेनिङ सेन्टर बनाउन स्थानीय निकायलाई आग्रह गर्नुभयो । खेलाडी पलायनलाई रोक्न आगामी बजेटमा केही योजनाहरू समावेश हुने राखेप सदस्यसचिव घिसिङको विश्वास छ । खेलाडी स्वरोजगारका निम्ति केही आफ्नै मन्त्रालयअन्तर्गत युवा स्वरोजगारसँग सहकार्यमा केही कार्यक्रमहरू बजेटमा उल्लेख गर्ने सदस्यसचिव घिसिङले आशा व्यक्त गर्नुभयो । उहाँले न्युनतम ब्याजदरमा खेलाडीलाई ऋण उपलब्ध गराउने जस्ता योजना बनिरहेको समेत बताउनु भयो । 

खेलाडी पुरस्कारमा ढिलाई भइरहेको अवस्थामा अबको बजेटमा रातो कितावमा नै पुरस्कार शिर्षकमा बजेट समावेश हुने वातावरण निर्माणको काम भइरहेको सदस्यसचिव घिसिङ विश्वास छ । खेलाडीले यति सफलता पाउँछन् र यति मात्रामा पुरस्कार रकम आवश्यक हुन्छ भन्ने पूर्वनिर्धारण गर्न नसकिए पनि निश्चिम रकम भने बजेटमा राख्ने उहाँको विश्वास छ । आगामी बजेटमा खेलाडीको स्वास्थ्य विमा लगायत विषय समावेश हुने उहाँको भनाइ छ ।

—न्युज एजेन्सी नेपाल

टंकलाल घिसिङराष्ट्रिय खेलकुद परिषद्

प्रकाशित मिति: बुधबार, चैत्र २१, २०८०, १०:५० बिहान

लेखक: समाचारपाटी