राष्ट्रिय सभाकी सांसद विष्णुदेवी पुडासैनीले सरकारले प्रदेशलाई अधिकार दिनेगरी कानूनी व्यवस्था गर्नुपर्ने बताउनुभएको छ ।
वागमती प्रदेश अन्तर्गतको राजधानी काठमाडौको नै सडक, पानी, बिजुलीको अवस्था दयनीय रहेकाले पनि प्रदेश सरकारले यसमा काम गर्नसक्ने गरी प्रदेशको अधिकारको व्यवस्था गर्न ढिलाई गर्न नहुने बताउनु भयो । शुक्रवार राष्ट्रिय सभा बैठकमा प्रदेश सरोकार समयमा बोल्दै सांसद पुडासैनीले विकास, निर्माणको कामको अनुगमन गर्ने काममा पनि तिब्रता दिन सरकारसँग माग गर्नुभयो । उहाँले वागमती नदी सफाईमा ध्यान दिन पनि सरकारलाई दबाब दिनुभयो । वागमती नदी ढलमतीमा परिणत भएकाले यसको सफाईमा सरकारले विशेष जोड दिनुपर्ने सांसद पुडासैनीको भनाई थियो ।
उहाँले भन्नुभयो, ‘आराध्यदेव पशुपतिनाथ, जुन ठाउँमा सम्पूर्ण नेपालीहरु भगवान पशुपतिनाथको दर्शन गर्न आउँछन् भने मृत्युवरण गरेका व्यक्तिहरुलाई पनि व्रम्हनालमा लगेर जल दिने व्यवस्था छ । तर अब अहिले बागमतीको अवस्था कस्तो छ भने यो ढलमतीमा परिणत भएको छ । त्यो जल झिकेर मत्यु भएका व्यक्तिलाई दिन नसक्ने अवस्था छ । त्यसका लागि आजको यो सदनले पनि ध्यानाकर्षण गरेर वागमती नदी सफा गर्नुपर्छ भन्ने मलाई लाग्छ । काठमाडौंमा सडक खाल्डैखाल्डो पारिएको छ । अहिले एउटाले पिच गरेको हुन्छ, अर्कोले खनिराखेको हुन्छ । यस्ता कुरा पनि सरकारबाट हेरिएको छैन । साँच्चनै वागमती प्रदेशको अवस्था दयनीय नै छ । यसका लागि म सम्माननीय सदनमार्फत काठमाडौं भन्नु मात्रै हो, बत्ती मुनिको अँध्यारो जस्तो छ । यहाँको अवस्था असजिलो नै असजिलो छ । हेर्दाखेरी सबैले सरकार यही छन । सबै राम्रो होला भन्यो । प्रदेशका माननीयहरुलाई सोध्यो, सडक, बाटोको अवस्था बारे । उहाँहरुले हामीलाई अधिकार नै नभएको भन्नु हुन्छ । संघीय सरकारले प्रदेश सरकारपनि अधिकार दिनुपर्यो नि । प्रदेशलाई अधिकार पनि दिनुपर्यो । यसलाई हेर्ने मूल्यांकन र अनुगमन पनि गरेर विकास, निर्माणको काम गर्नेतिर जानुपर्यो । जनताको मन छुने काम गर्नुपर्यो ।’
सांसद पुडासैनीले वागमती प्रदेशमा पनि मकवानपुर, रसुवा, रामेछाप लगायतका जिल्लाहरु विकट अवस्थामा रहेको उल्लेख गर्दै त्यसलाई सुगम बनाउन पनि सरकार लाग्नुपर्ने आवश्यकता औंल्याउनु भयो ।
—न्युज एजेन्सी नेपाल