सुर्खेत । करेन्ट लागेर दैलेखमा एक युवाको मृत्यु भएको छ । मृत्यु हुनेमा अछामको पञ्चदेवल विनायक नगरपालिका-४, लयाँटीका २९ वर्षीय प्रकाश बुढा रहेका जिल्ला प्रहरी कार्यालय कालीकोटका प्रमुख डीएसपी अजुर्न केसीले जानकारी दिनुभयाे ।

दैलेख र कालीकोटको सिमाना दहीखोला नजिकै एभरेस्ट नेटवर्क प्रालिको फाइवर विस्तार गर्ने क्रममा घाइते हुनुभएका बुढाको उपचारका क्रममा प्रदेश अस्पताल सुर्खेतमा मृत्यु भएको हो । उहाँ एभरेस्ट नेटवर्ककै कर्मचारी रहेको प्रहरीले जनाएको छ । डीएसपी केसीका अनुसार मंगलबार बेलुकी बिजुलीको पोलमा करेन्ट लागेको थियो ।

प्रहरीलाई बेलुका ८ बजेमात्रै घटनाबारे जानकारी भएपछि उहाँलाई प्रदेश अस्पताल ल्याइएको थियो । राति ११ बजे अस्पतालले उहाँलाई मृत घोषणा गरेको थियो । राष्ट्रिय प्रसारण लाइनको पोलमा एभरेस्ट नेटवर्कको फाइवर विस्तारका क्रममा उहाँको मृत्यु भएको प्रहरीले जनाएको छ । घटनाबारे थप अनुसन्धान भैरहेको डीएसपी केसीले बताउनुभयाे ।

करेन्टदैलेख

प्रकाशित मिति: बुधबार, माघ २४, २०८०, १:१३ बेलुका

लेखक: समाचारपाटी