नेकपा (माओवादी केन्द्र)ले सबै तहको कमिटी प्रत्यक्ष निर्वाचनबाट निर्वाचित गर्ने भएको छ । माओवादी केन्द्रको बिहीबार सम्पन्न विधान अधिवेशनले पार्टीको सबै कमिटी प्रत्यक्ष निर्वाचनबाट निर्वाचित गर्ने निर्णय गरेको हो । बैठकपछि सञ्चारकर्मीहरुसँग कुराकानी गर्दै प्रवक्ता अग्निप्रसाद सापकोटाले पार्टीले प्रत्यक्ष निर्वाचनको ढोका खोलेको बताउनु भयो । उहाँले पदाधिकारीमा भने केन्द्रिय कमिटीको निर्वाचनपछि मात्रै निर्वाचन गरिने जानकारी दिनुभयो । केन्द्रिय कमिटीले पदाधिकारी निर्वाचित गर्ने उहाँको भनाई छ । त्यस्तै विधान अधिवेशनले केन्द्रिय समिति १९९ जनाको र पदाधिकारी ११ जनाको बनाउने निर्णय गरेको छ । आयोगहरुमा १५ जनासम्म सदस्य राख्ने भनिएको छ । प्रवक्ता सापकोटाले विधानलाई छोटो बनाउँदै सबै कुराहरुलाई नियमावलीमा स्पष्ट पार्ने निर्णय भएको बताउनु भयो । अधिवेशनले पार्टीको नाम र चुनाव चिन्ह तत्काल नफेर्ने तर सन्दर्भ आएपछि फेर्न सकिने निर्णय गरेको पनि उहाँले जानकारी दिनुभयो । 

अधिवेशनको निर्णय बारे जानकारी दिँदै प्रवक्ता सापकोटाले भन्नुभयो – ‘हरेक कमिटी प्रत्यक्ष निर्वाचनद्वारा गरिनेछ । प्रत्यक्ष निर्वाचनको ढोका खुलेको छ । सबै कमिटीमा प्रत्यक्ष निर्वाचन हुन्छ । केन्द्रिय कमिटीको निर्वाचन भइसकेपछि पदाधिकारी चाहीँ केन्द्रिय कमिटीले निर्वाचन गर्छ । सदस्यताको उमेर १८ वर्ष नै कायम गर्ने भन्ने भएको छ । केन्द्रिय समिति १९९ जनाको बनाउने भन्ने भएको छ । पदाधिकारी ११ जनाको बनाउने भन्ने भएको छ । आयोगहरुमा १५ जनासम्म राख्ने भन्ने भएको छ । कमिटी आगामी महाधिवेशनबाट बनाइने छ । योग्यता, कार्यविधि बारे नियमावलीमा प्रष्ट गरिनेछ । हामीले विधान छोटो बनाउने भनेका छौँ । विधान छोटो बनाएपछि हामीले सबै कुरा नियमावलीमा व्यवस्थामा गर्नेछौँ । हामी नाम सन्दर्भ मिलाएर बदल्न पनि सक्छौँ । तर आजै चाहीँ बदल्ने निर्णय भएको छैन । चुनाव चिन्ह पनि सन्दर्भ आएपछि सोच्न सकिन्छ भन्नेछ । सबै जनवर्गिय संगठनको सम्मेलन गर्ने र पुनःगठन गर्ने निर्णय भएको छ । भारतमा, मध्यपूर्वमा र बाँकी विश्वमा ३ वटा छुट्टै प्रदेशस्तरीय समिति बनाउने छ । अबको महाधिवेशन जिल्लाबाट प्रदेश हुँदै होइन, माथिबाट १९९ कमिटी बन्छ र तलसम्म हुँदै जान्छ ।’

त्यस्तै, माओवादी केन्द्रले सबै जनवर्गिय संगठनहरुको सम्मेलन गर्ने र पुनःगठन गर्ने निर्णय भएको छ । अधिवेशनले भारत, मध्यपूर्व र बाँकी विश्वमा गरी ३ वटा छुट्टाछुट्टै प्रदेशस्तरीय समिति बनाउने निर्णय पनि गरेको प्रवक्ता सापकोटाले जानकारी दिनुभयो । आगामी अधिवेशन माथिल्लो तहको कमिटीबाट शुरु हुने उहाँको भनाई छ । —न्युज एजेन्सी नेपाल

निर्वाचितनेकपा माओवादी केन्द्र

प्रकाशित मिति: शुक्रबार, फाल्गुन ४, २०८०, १०:३८ बिहान

लेखक: समाचारपाटी