वागमती बिच रग्बी महिला प्रतियोगिता पहिलो संस्करण असारको दोस्रो साता हुने भएको छ । नेपाल रग्बी संघको आयोजना र बागमति प्रदेश रग्बी संघको व्यवस्थापनमा पहिलोपल्ट बिच रग्बी प्रतियोगिता हुन लागेको हो । सिन्धुपाल्चोकको सुकुटेबिचमा उक्त प्रतियोगिता हुने भएको छ । संघका प्रवक्ता तथा कोषाध्यक्ष दीपक अधिकारीका अनुसार प्रतियोगिता असार ८ र ९ गते (आइतबार र सोमवार) हुनेछन् । अन्तर्राष्ट्रिय ओलम्पिक दिवसको अवसरमा यो प्रतियोगिता हुन लागेको हो । बागमति प्रदेश खेलकुद विकास परिषद् र राष्ट्रिय खेलकुद परिषद्को सहयोगमा हुने प्रतियोगितामा कुल ६ टोलीले प्रतिष्पर्धा गर्नेछन् ।

प्रतियोगितामा कर्णाली, वागमती र मधेस प्रदेशले सहभागिता जनाउनेछन् । राष्ट्रिय स्तरका गोर्खाली रग्बी क्लब, नेपाल महिला रग्बी क्लव र सिन्धुपाल्चोक रग्बी  क्लव गरी ६ महिला टिमले सहभागिता जनाउने छन् । हरेक टोलीमा कुल ६ खेलाडी रहने बागमती प्रदेश रग्बी संघकी अध्यक्ष बिनु खड्काले जानकारी दिइन् । एउटा टोलीबाट ५ जना खेलाडी मात्र प्रतिस्पर्धामा सहभागी गराउन पाउनेछन् । 

यो प्रतियोगिता सन्चालन गर्न १३ लाख रूपैयां खर्च लाग्नेछ । एशिया रग्बीको बिल्डिङ अ ग्रिनरी फ्युचर थ्रु रग्बी एन्ड सस्टेएबेलीटी अनुसार ए ट्राइ ए ट्री अनुरूप हरेक ट्राइबापत एक बिरूवा रोप्ने संघकी महिला विभाग प्रमुख एलिसा थापाले जानकारी दिइन् । —न्युज एजेन्सी नेपाल

रग्बी महिला प्रतियोगिता

प्रकाशित मिति: शनिबार, असार ७, २०८२, १०:१५ बिहान

लेखक: समाचारपाटी