काठमाडौँ । शिक्षा, विज्ञान तथा प्रविधि मन्त्रालयले शैक्षिक परामर्श सेवा प्रदायक संस्था (कन्सल्टेन्सी) लाई कानुन विपरीतको कार्य नगर्न चेतावनी दिएको छ ।
मन्त्रालयबाट अनुमति पाएका संस्थाहरूले शैक्षिक परामर्श सेवा तथा भाषा शिक्षण सम्बन्धी निर्देशिका, २०७३ बमोजिम सेवा सञ्चालन गर्न सचेत गराएको हो । शैक्षिक परामर्श तथा प्रमाणीकरण शाखाका उपसचिव सेमन्तराज कोइरालाले एक सूचना जारी गर्दै निर्देशिका विपरीत सञ्चालन गरेको पाइएमा कारबाही गर्ने चेतावनी दिएका छन् ।

निर्देशिकाले दिएको अधिकार क्षेत्र बाहिर गएर यस्ता कार्य सम्पादन गरेमा सोही निर्देशिकाको दफा ६ बमोजिम संस्थाको स्वीकृति रद्द गरिने समेत मन्त्रालयले चेतावनी दिएको छ । २०७५ साल १४ गतेभन्दा अगाडि स्थापना भएका कन्सल्टेन्सीहरूको यो वर्ष नवीकरण गरिएको थियो ।

नवीकरण गरेका कतिपय संस्थाहरूले अनुमति नपाएको क्षेत्रमा समेत शाखा कार्यालय खोल्ने, अनुमति दिएको स्थानभन्दा बाहिर गएर सेवा प्रदान गर्ने जस्ता कार्य गरिरहेको गुनासो मन्त्रालयमा पुगेको थियो ।

कन्सल्टेन्सीलाई कानुनविपरीतको कार्य नगर्न चेतावनी

प्रकाशित मिति: सोमवार, माघ २१, २०८१, ४:५२ बेलुका

लेखक: समाचारपाटी