राष्ट्रिय सभा सदस्य वामदेव गौतमले राष्ट्रिय सभाको सदस्यले पनि प्रधानमन्त्रीको दाबेदारी प्रश्तुत गर्न पाउनुपर्ने व्यवस्था हुनुपर्ने बताउनुभएको छ ।

बुधवारको राष्ट्रिय सभा बैठकमा बोल्दै उहाँले यस्तो बताउनुभएको हो । उहाँले राष्ट्रिय सभा सदस्य पनि प्रधानमन्त्रीको उम्मेदवार बन्न पाउने व्यवस्था हुनुपर्ने माग राख्नुभयो । उहाँले राष्ट्रिय सभा र प्रतिनिधि सभाका सदस्यहरुको संलग्नता भएको प्रश्तावबाट मात्रै प्रधानमन्त्रीलाई अविश्वास गर्न पाउने व्यवस्था हुनुपर्ने बताउनु भयो । उहाँले राष्ट्रिय सभा अध्यक्ष र प्रतिनिधि सभा सभामुख बाहेक अरु कसैलाई पनि महाअभियाग लगाउँदा राष्ट्रिय सभा सदस्यहरुको संलग्नता बेगर लगाउन नपाउने व्यवस्था राख्नुपर्ने बताउनु भयो । उहाँले दुवै सभाबाट उत्पत्ति हुने विधेयक अन्तिममा पारित गर्ने अधिकार प्रतिनिधि सभालाई नभइ संघीय संसदको संयुक्त बैठकलाई हुनुपर्ने बताउनु भयो । उहाँले प्रतिनिधि सभा र राष्ट्रिय सभाका अधिकार र कर्तव्य समान हुनुपर्ने बताउनु भयो । उहाँले संघीय संसदमा संयुक्त बैठकहरुको अध्यक्षता अध्यक्ष र सभामुखले आलोपालो गर्ने व्यवस्था गर्नुपर्ने बताउनु भयो । उहाँले राष्ट्रपतिको निर्वाचन संघीय संसदको संयुक्त बैठकले गर्नुपर्ने बताउनु भयो ।

उहाँले भन्नुभयो, ‘मैले भन्नैपर्छ, प्रतिनिधि सभा नियमावली बमोजिम चलेन । धेरै त्यस्ता प्रमाणहरु छन्, प्रतिनिधि सभामा जहाँ सभामुखले नियमअनुसार कारबाही गरेको पनि पाइएन, भद्रगोल भयो । तर म आइसकेपछि राष्ट्रिय सभाको पूर्वअध्यक्षद्वारा जसरी भुमिका निर्वाह भयो, त्यो सम्झँदा मलाई पनि गौरव लाग्छ । प्रतिनिधि सभा र राष्ट्रिय सभाका अधिकार र कर्तव्य समान हुनुपर्छ । समान जिम्मेवारी पूरा गर्नुपर्छ । संघीय संसदमा संयुक्त बैठकहरुको अध्यक्षता अध्यक्ष र सभामुखले आलोपालो गर्ने व्यवस्था गर्नुपर्छ । एकदिन अध्यक्ष र अर्कोदिन सभामुखले । राष्ट्रपतिको निर्वाचन संघीय संसदको संयुक्त बैठकले गर्नुपर्छ । राष्ट्रिय सभा सदस्य पनि प्रधानमन्त्रीको उम्मेदवार बन्न पाउने व्यवस्था हुनुपर्छ । राष्ट्रिय सभा र प्रतिनिधि सभाका सदस्यहरुको संलग्नता भएको प्रश्तावबाट मात्रै प्रधानमन्त्रीलाई अविश्वास गर्न पाउने व्यवस्था हुनुपर्छ । राष्ट्रिय सभा अध्यक्ष र प्रतिनिधि सभा सभामुख बाहेक अरु कसैलाई पनि महाअभियोग लगाउँदा राष्ट्रिय सभा सदस्यहरुको संलग्नता बेगर हुनु हुँदैन । दुवै सभाबाट उत्पत्ति हुने विधेयक अन्तिममा पारित गर्ने अधिकार संघीय संसदको संयुक्त बैठकलाई हुनुपर्छ, प्रतिनिधि सभालाई होइन ।’
उहाँले प्रतिनिधि सभा नियमावली बमोजिम चल्न नसकेको जिकिर गर्नुभयो । उहाँले राष्ट्रिय सभाका पूर्वअध्यक्ष गणेशप्रसाद तिमिल्सिनाले सभा सञ्चालनमा कार्यकुशलता देखाएको भन्दै प्रशंसा गर्नुभयो । —न्युज एजेन्सी नेपाल

राष्ट्रिय सभा सदस्यवामदेव गौतम

प्रकाशित मिति: बुधबार, फाल्गुन ३०, २०८०, ५:४७ बेलुका

लेखक: समाचारपाटी