अमेरिकी राष्ट्रपति डोनाल्ड ट्रम्पले पूर्वराष्ट्रपति जोन एफ. केनेडी (जेएफके), उनका भाइ रोबर्ट एफ. केनेडी (आरएफक) र नागरिक अधिकार नेता मार्टिन लुथर किंग जूनियर (एमएलक) को हत्याका बाँकी फाइलहरू सार्वजनिक गर्न कार्यकारी आदेशमा हस्ताक्षर गर्नुभएको छ । राष्ट्रपति जोन एफ. केनेडीको हत्यासँग सम्बन्धित रेकर्डहरूबाट जानकारीको निरन्तर सम्पादन र रोक लगाउने कार्य सार्वजनिक हितसँग मेल नखाने भन्दै उहाँले यी रेकर्डहरूको प्रकाशन लामो समयदेखि हुन बाँकी रहेकाले सार्वजनिक गर्न लागिएको बताउनु भयो । यद्यपि कंग्रेसको कुनैपनि ऐनले सिनेटर रोबर्ट एफ. केनेडी र रेभरेन्ड डा. मार्टिन लुथर किंग, जूनियरको हत्यासँग सम्बन्धित जानकारीको प्रकाशनलाई निर्देशन दिँदैन । प्रत्येक हत्यासँग सम्बन्धित संघीय सरकारको स्वामित्वमा रहेका सबै रेकर्डहरूको प्रकाशन पनि सार्वजनिक हितमा रहेको ट्रम्पले बताउनु भयो । कार्यकारी आदेशमा ट्रम्पले राष्ट्रिय गुप्तचर निर्देशक र महान्यायाधिवक्तालाई १५ दिन भित्र हत्यासँग सम्बन्धित रेकर्डहरूको पूर्ण प्रकाशनको लागि योजना प्रश्तुत गर्न निर्देशन दिनुभएको छ । संयुक्त राज्य अमेरिकाका ३५ औं राष्ट्रपति जेएफकेको नोभेम्बर २२, १९६३ मा टेक्सासको डलासमा मोटरकाडमा सवार हुँदा हत्या गरिएको थियो । ली हार्वे ओस्वाल्डलाई हत्यामा पक्राउ गरिएको थियो । तर हत्याको दुई दिन पछि ओस्वाल्डको अचानक मृत्यु भएको थियो । 
१९९२ मा कंग्रेसले हत्यासँग सम्बन्धित सबै कागजातहरू २५ वर्षभित्र अक्टोबर २६, २०१७ सम्ममा जनतालाई उपलब्ध गराउनुपर्ने आवश्यकता राखेको थियो । जनवरी २०१७ मा शुरु भएको आफ्नो पहिलो कार्यकालमा ट्रम्पले कार्यकारी विभाग र एजेन्सीहरूबाट प्रश्तावित सम्पादनहरू स्वीकार गर्नुभयो । तर बाँकी सम्पादनहरूको निरन्तर पुनर्मूल्याङ्कन गर्ने आदेश दिनुभयो । ट्रम्पको उत्तराधिकारी जो बाइडेनले २०२१, २०२२ र २०२३ मा यी रेकर्डहरू सम्बन्धी पछिल्ला प्रमाणपत्रहरू जारी गर्नुभयो । जसले एजेन्सीहरूलाई कागजातहरूको समीक्षा गर्न र सार्वजनिक खुलासाबाट जानकारी रोक्न थप समय दिएको थियो । 
केनेडी परिवारका अर्का प्रमुख व्यक्तित्व, आरएफके अमेरिकी सिनेटर र महान्यायाधिवक्ताको रूपमा आफ्नो भूमिकाका लागि प्रसिद्ध थिए । सन् १९६८ मा डेमोक्रेटिक राष्ट्रपति पदको उम्मेदवारीको अभियानको क्रममा उनको हत्या भएको थियो । स्वास्थ्य तथा मानव सेवा सचिवका लागि ट्रम्पका मनोनित रोबर्ट एफ. केनेडी जूनियर आरएफके वरिष्ठका छोरा हुन् । एमएलके अमेरिकी नागरिक अधिकार आन्दोलनमा सबैभन्दा प्रमुख व्यक्तित्वहरू मध्ये एक हुन् । जातीय पृथकीकरण र असमानता विरुद्धको अहिंसात्मक अभियानप्रतिको उनको प्रतिवद्धता, साथै उनको प्रसिद्ध आई ह्याभ अ ड्रीम भाषणको लागि उनी प्रख्यात छन् । 
सिन्ह्वा

अमेरिकी राष्ट्रपति डोनाल्ड ट्रम्प

प्रकाशित मिति: आइतवार, माघ १३, २०८१, २:०७ बेलुका

लेखक: समाचारपाटी