संयुक्त राष्ट्रको अदालतद्वारा गाजामा इजरायलको कारवाही बिरुद्ध दक्षिण अफ्रिकाको निवेदनमा सुनुवाइ समाप्त

गाजामा इजरायलको सैन्य आक्रमण रोक्न दक्षिण अफ्रिकाको अनुरोधको सम्बन्धमा अन्तर्राष्ट्रिय अदालत (आईसीजे) ले आफ्नो दुई दिने सुनुवाइ पूरा गरेको छ । गाजामा इजरायलको सैन्य कारबाही रोक्न आदेशको लागि दक्षिण अफ्रिकाले एक हप्ताअघि आईसीजेमा निवेदन दिएपछि सुनुवाइहरू बोलाइएको थियो । बिहीवारको सत्रमा, नेदरल्याण्ड्सका लागि दक्षिण अफ्रिकाका राजदुत वुसिमुजी मडोन्सेलाले इजरायललाई रफाह लगायत गाजामा आफ्नो सैन्य कारबाही बन्द गर्न र सम्पूर्ण गाजा पट्टीबाट आफ्ना सेना फिर्ता गर्न आदेश दिन अदालतलाई आग्रह गर्नुभयो । राजदुतले इजरायललाई संयुक्त राष्ट्र र मानवीय सहायताका लागि गाजामा निर्वाध पहुँच सुनिश्चित गर्न सबै प्रभावकारी उपायहरू लिन आग्रह गर्नुभयो । इजरायली वकिल तामार कपलान टुर्गेम्यानले इजरायलको आफ्नो रक्षा गर्ने अन्तरनिहित अधिकारलाई जोड दिनुभयो । दक्षिण अफ्रिकाको अनुरोध अस्वीकार गर्न अदालतलाई आग्रह गर्नुभयो । आईसीजेका अध्यक्ष नवाफ सलामले सुनुवाइको अन्त्य गर्दै अदालतले सार्वजनिक बैठकमा जति सक्दो चाँडो आफ्नो आदेश दिने बताउनु भयो । संयुक्त राष्ट्र संघ (यूएन) ले बिहीवार इजरायल र इस्लामिक प्रतिरोध आन्दोलन (हमास) बीच चलिरहेको युद्धको बीचमा गाजा पट्टीमा मानवीय सहायता वितरण लगभग असम्भव भएको बताएको छ । गाजा पट्टीमा जारी इजरायली आक्रमणबाट हालसम्म प्यालेस्टाइनीको मृत्यु हुनेको संख्या ३५ हजार नाघेको छ ।
सिन्ह्वा