काठमाडौं । उपप्रधान, अर्थ मन्त्री एवम् नेकपा एमालेका उपाध्यक्ष विष्णु पौडेलले राष्ट्रपतिमा आफ्नो पार्टीले उठाएको उम्मेदवारले जित्ने दाबी गर्नुभएको छ ।

बुधवार संसद् भवन नयाँ बानेश्वरमा सञ्चारकर्मीहरूसँग कुराकानी गर्दै उपाध्यक्ष पौडेलले राष्ट्रपति चुनावमा एमालेले उठाएको उम्मेदवारले जित हासिल गर्ने दाबी गर्नुभएको हो । उहाँले वर्तमान सरकार बन्दा नै राष्ट्रपति एमालेले पाउने सहमति भएकाले त्यही सहमतिको आधारमा एमाले उम्मेदवारले जित्ने बताउनुभयो । सत्तारूढ गठबन्धनमा भएको भागबन्डाको सहमति कार्यान्वयन हुने उहाँले बताउनुभयो ।

उहाँले भन्नुभयो, ‘सरकारमा सहभागी दलहरूका बीचमा भएको सहमति नै नेकपा एमालेका तर्फबाट अघि सारेको उम्मेदवारको जितको आधार हो । म के कुरामा विश्वस्त छु भने सरकार गठनको पृष्ठभूमिमा सरकारमा सहभागी, सरकारलाई समर्थन गर्ने दलहरूका बीचमा भएको सहमति कार्यान्वयन हुन्छ । नेकपा एमाले का तर्फबाट अघि सारिएको राष्ट्रपतिको उम्मेदवारले सानदार ढङ्गले जित हासिल गर्नुहुन्छ ।’

त्यस्तै एमाले सचिव गोकर्ण विष्टले एमाले उम्मेदवारलाई राष्ट्रपतिमा निर्वाचित गराउनु नै राष्ट्रिय सहमति हुने जिकिर गर्नुभयो । उहाँले सत्तारूढ गठबन्धनका बीचमा भएको सहमति प्रधानमन्त्रीले इमानदारितापूर्वक कार्यान्वयन गर्नुपर्ने बताउनुभयो ।

उपाध्यक्ष विष्णु पौडेल

प्रकाशित मिति: बुधबार, फाल्गुन १०, २०७९, ६:१४ बेलुका

लेखक: समाचारपाटी