काठमाडौं । ललितपुर, च्यासलस्थित पार्टी केन्द्रीय कार्यालयमा नेकपा (एमाले)को केन्द्रीय कमिटी बैठक आज बिहान ११ बजेबाट पुनः सुरु हुनेछ। आइतबारदेखि जारी रहेको यो बैठकमा केन्द्रीय सदस्यहरूले राजनीतिक र साङ्गठनिक प्रतिवेदनमाथि आ–आफ्नो धारणा राख्ने क्रम जारी छ।

आइतबारको बैठकमा प्रधानमन्त्रीसमेत रहेका पार्टी अध्यक्ष केपी शर्मा ओलीले राजनीतिक प्रतिवेदन प्रस्तुत गरेका थिए भने महासचिव शङ्कर पोखरेलले साङ्गठनिक प्रतिवेदन पेस गरेका थिए। उक्त प्रतिवेदनमाथि आइतबार २७ जना केन्द्रीय सदस्यहरूले आफ्नो धारणा राखेका थिए।

आजको बैठकमा बाँकी केन्द्रीय सदस्यहरूले धारणा राखेपछि प्रतिवेदनहरूबारे निष्कर्ष प्रस्तुत गरिने एमाले नेताहरूले बताएका छन्। बैठकले पार्टीको आगामी रणनीति र साङ्गठनिक गतिविधिहरूको दिशा तय गर्ने अपेक्षा गरिएको छ।

केन्द्रीय कमिटी बैठकच्यासलस्थित पार्टी केन्द्रीय कार्यालय

प्रकाशित मिति: सोमवार, पुस २२, २०८१, ११:२३ बिहान

लेखक: समाचारपाटी