काठमाडौं । चोरी गरेको आरोपमा त्रिभुवन अन्तर्राष्ट्रिय विमानस्थलमा नेपाल वायुसेवा निगमको लोडरको रूपमा कार्यरत एक जना पक्राउ परेका छन्। दैलेख महावु गाउँपालिका-३ घर भई काठमाडौं काँडाघारी बस्ने ३५ वर्षीय देव बहादुर सुनारलाई बुधबार दिउँसो प्रहरीले पक्राउ गरेको हो।

प्रहरीका अनुसार नेपाल एयरलाइन्सको उडानद्वारा काठमाडौंबाट बैंकक प्रस्थान गर्न लागेका यात्रु याङ्गहाङ सुब्बाको झोलाबाट थाई भाट २० हजार चोरी गरेको अभियोगमा त्रिभुवन अन्तर्राष्ट्रिय विमानस्थलमा नेपाल बायुसेवा निगमको लोडरको रूपमा कार्यरत सुनार पक्राउ परेकाे प्रहरीले जनाएकाे छ ।

याङ्गहाङले आफ्नो थाई भाट चोरी भएको भनी निवेदन दिए पश्चात सिसिटिभि समेतको अवलोकन गरी प्रारम्भिक अनुसन्धान गर्दा सुनारको गतिविधि शंकास्पद देखिएकोले नियन्त्रणमा लिएर अनुसन्धानको क्रममा सुनारले उक्त थाई भाट चोरी गरेको खुल्न आएको हो।

सुनारको शरीर तथा लकर तलासी गर्दा विभिन्न दरका थाई भाट १९ हजार ४ सय समेत बरामद भएको छ । उहाँलाई थप अनुसन्धान एवम् कारवाहीको लागि प्रहरी वृत्त गौशाला पठाइएको छ ।

annapurnapost

त्रिभुवन अन्तर्राष्ट्रिय विमानस्थल

प्रकाशित मिति: बिहिबार, माघ १८, २०८०, १२:४३ बेलुका

लेखक: समाचारपाटी