काठमाडौं I जय ट्रफी एलिट कप क्रिकेटमा नेपाल पुलिस क्लबसँगको खेलमा त्रिभुवन आर्मी क्लब पहिलो पारीमा १२१ रनमा अलआउट भएको छ। टस हारेर ब्याटिङ गरेको आर्मी ३४.१ ओभरमा सबै विकेट गुमायो।

कुशल मल्लले टोलीका लागि सर्वाधिक २५ रन बनाए, जबकि पुलिसका ललित राजवंशीले प्रभावशाली प्रदर्शन गर्दै ७ विकेट लिए। अब पुलिसले पहिलो पारीको ब्याटिङ थाल्नेछ।

यसैबीच, जनकपुरमा भइरहेको अर्को खेलमा मधेश प्रदेश र बाग्मती प्रदेशबीच प्रतिस्पर्धा भइरहेको छ। टस जितेर ब्याटिङ गरिरहेको मधेश प्रदेशले समाचार तयार पार्दासम्म ७ विकेट गुमाएर ९८ रन बनाएको छ।

जय ट्रफीमा चार टोलीको सहभागिता रहेको छ, जसमा त्रिभुवन आर्मी, नेपाल पुलिस, मधेश प्रदेश, र बाग्मती प्रदेश समावेश छन्। प्रतियोगिता दुई दिवसीय फर्म्याटमा खेलाइँदैछ, जसमा लिग चरणका खेलहरू सिङ्गल राउन्ड रोबिन आधारमा हुँदैछन्।

शीर्ष दुई टोली फाइनलमा प्रवेश गर्नेछन्, जुन तीन दिवसीय फर्म्याटमा हुनेछ। आर्मीको कप्तानी विनोद भण्डारीले गरेका छन् भने पुलिस, मधेश, र बाग्मतीको कप्तानी क्रमशः आरिफ शेख, हरि शंकर, र सन्दीप लामिछानेले गरिरहेका छन्।

जय ट्रफी एलिट कप क्रिकेट

प्रकाशित मिति: आइतवार, पुस २१, २०८१, ३:४९ बेलुका

लेखक: समाचारपाटी