दुलेगौंडा । गण्डकी प्रदेशका भौतिक पूर्वाधार तथा यातायात व्यवस्था मन्त्री प्रकाश बहादुर केसीले शुक्लागण्डकीका दुई महत्वपूर्ण निर्माणाधिन योजनाको अनुगमन गर्नुभएकाे छ । लामो समयदेखि निर्माणमा ढिलाई भएको प्रदेशको एक निर्वाचन क्षेत्र एक रणनितिक सडक अन्तर्गत दुलेगौंडा हर्कपुर मोटरमार्ग र वडा नंं ५ र ८ जोड्ने सेती नदि माथि निर्मित मोटरेबल पुलको बुधवार अनुगमन गर्नुभएकाे हाे ।

सो अवसरमा मन्त्री केसीले निर्माण व्यवसायीका कारण ढिलाई भएका ती योजनाहरुलाई काममा गति दिन निर्माण व्यवसायीलाई निर्देशन दिनुभयाे । गण्डकी प्रदेशका पूर्व आर्थिक मामिला मन्त्री किरण गुरुङ, मन्त्रालयका सचिव कमल कुमार अधिकारीसहित पुग्नुभएका उहाँले सरकारकोतर्फबाट कुनै समस्या भए सहजिकरण गर्न तयार रहेको बताउँदै तत्काल कामदार बढाएर प्रगति बढाउन आग्रह गर्नुभयाे ।

वि.स. २०५२ सालमा ट्रयाक खोलिएको दुलेगौडा–हर्कपुर सडक १०.१८ किलोमिटर सडक कालोपत्रका लागि विसं २०७६ कात्तिक ४ गते सम्झौता भई २०७६ साल मंसिर २४ गते शिलान्यास गरिएको थियो । २०७८ माघ १० गते भित्र सम्पन्न हुनुपर्ने सडक पटक पटक म्याद थप गरिएको छ । आगामी असारसम्म म्याद रहेको उक्त खण्डको प्रगति हालसम्म ४१ प्रतिशत
रहेको पूर्वाधार विकास कार्यालय तनहुँका प्रमुख रविन्द्र तिवारीले बताउनुभयाे ।

उक्त खण्ड कालोपत्रका लागि एमएस शंकरमाली निर्माण सेवाले रु २५ करोड १० लाख ६० हजारमा सम्पन्न गर्ने गरी सम्झौता गरेको हो । शुक्लागण्डकी नगरपालिका, म्याग्दे गाउँपालिका हुँदै व्यास नगरपालिकासँग जोडिने उक्त खण्डको दूरी २३ किलोमिटर छ । पहिलो चरणमा १० किलोमिटर सडक कालोपत्रका लागि ठेक्का सम्झौता भएको हो । ट्रयाक खुलेको २४ वर्षपछि स्तरोन्नती सुरु हुँदा स्थानीयवासी खुसी भएका थिए । तर कामको प्रगति नहुदा स्थानीवासीले चुनावको बेला मात्र सडकको विषय बनाउने गरेको भन्दै टिप्पणी गर्ने गर्नुभएकाे छ ।

स्थानीय एवम् दुलेगौंडा हर्कपुर मोटरमार्ग उपभोक्ता समितिका पूर्व अध्यक्ष देउ बहादुर गुरुङले यस क्षेत्रकै सबैभन्दा पुरानो सडक समयमै सम्पन्न नहुदा स्थानीय र यात्रुले धुलो र हिलोको मार खेपेको बताउँदै चाडो सम्पन्न गराउन ध्यानाकर्षण गराउनुभयाे । निर्माण व्यवसायी श्याम लामाले कोभिडसँगै निर्माण कम्पनीलाई आर्थिक रुपमा नोक्सान परेको बताउँदै आर्थिक
समस्याका कारण काम सम्पन्न गर्न समस्या परेको बताउनुभयाे । उहाँले कामदारको संख्या बढाएर समयमै सम्पन्न गर्ने प्रतिवद्धता जनाउनुभयाे ।

यसैगरी शुक्लागण्डकी–५ र ८ स्थित बेलचौतारा–मुस्ताब क्याम्प जोड्ने मोटरेबल पुलको कामले गति नलिएको भन्दै उपभोक्ता समितिले मन्त्री केसीले ध्यानाकर्षण गराउनुभयाे । शुरुको सम्पन्न गर्नुपर्ने मिति गत वर्षको जेठ २० गते भएकोमा २०८२ मंसिर २० सम्म म्याद थप भएको छ । कामको प्रगति करिव ३० प्रतिशत मात्र छ । २०७७ मंसिर २४ मा मुल्य अभिवृद्धि सहित
१५ करोड ५९ लाख रुपैयामा पुल निर्माणकालागि महाविर खिम्ती अञ्जना पराजुली जेभीले सम्झौता गरेको हो । टायल फाउण्डेसनमा निर्माण हुने पुल १ सय ५०.४ मिटर लामो रहने छ । ४ वटा स्पानमध्य हाल एक स्पान मात्र ढलान भएको छ । निर्माण कम्पनीलाई हालसम्म ८ करोड १३ लाख भुक्तानी भइसकेको छ । पूर्वाधार विकास कार्यालय तनहुँका प्रमुख तिवारीले कार्यालयकोतर्फबाट काम गर्न कुनै समस्या नरहेको प्रष्ट पार्नुभयाे । उहाँका अनुसार वडा नंं. ८ तर्फ ३ वटासम्म स्पान थप भएमा ४०.२५ प्रतिशत अर्थात ६ करोड २७ लाख रुपैया बजेट थप गर्नुपर्ने देखिएको छ । स्थानीय बाबुराम कार्कीले पुल निर्माणको कामले गति नलिदा वडा नं. ८ तर्फ कटान बढ्दै गएको बताउनुभयाे । उहाँले स्थानीय स्तरबाट निर्माण व्यवसायीलाई सबै सहयोग गर्दै आएपनि कामले गति लिन नसकेको उल्लेख गर्नुभयाे ।

मन्त्री केसीले मन्त्रालय अन्तर्गतका लामो समयसम्म सम्पन्न नभएका समस्याग्रत योजनालाई आँफूले चाडै सम्पन्न गर्नतर्फ केन्द्रित गरेको बताउनुभयाे । समयमै विकास निर्माणका योजना सम्पन्न नहुदा जनताले दुःख पाउने गरेको बताउँदै शुरु भएका योजनालाई आर्थिक अभाव हुन नदिने प्रतिवद्धता जनाउनुभयाे ।

प्रकाशित मिति: बिहिबार, माघ १७, २०८१, ७:२८ बिहान

लेखक: समाचारपाटी