काठमाडौं। अमेरिकाको लस एन्जल्सको जंगलबाट फैलिएको डढेलो हलिउड हिल्ससम्म पुगेपछि क्षेत्रका कैयौं प्रसिद्ध स्थान खाली गराइएको छ। डल्बी थिएटर, हलिउड बाउल आउटडोर एम्फिथिएटर, र हलिउड वक अफ फेमजस्ता स्थान खाली गरिँदा मानिसहरू केही सामग्री बोकेर अन्यत्र जान दौडधुप गरिरहेका छन्। बीबीसीका अनुसार, आगलागीमा परी कम्तीमा पाँच जनाको मृत्यु भएको छ।

लस एन्जलसमा डढेलो फैलिँदै जाँदा कम्तीमा १,५०० भवन जलेर नष्ट भएका छन् भने एक लाखभन्दा बढी मानिस विस्थापित भएका छन्। लस एन्जलस काउन्टीका अग्नि नियन्त्रक एन्थोनी मारोनले आफू मातहतका कर्मचारीहरू विपत्तिको सामना गरिरहेको बताए। उनले भने, "हामीले सक्दो प्रयास गरिरहेका छौं, तर हामीसँग पर्याप्त अग्नि नियन्त्रकहरू छैनन्।"

पासाडेनाका अग्नि नियन्त्रक चाड अगस्टिनले ५०० भन्दा बढी भवन नष्ट भएको र आगो नियन्त्रणमा ल्याउन कठिनाइ भएको बताएका छन्। अगस्टिनले अग्नि नियन्त्रकहरूको वीरताको प्रशंसा गर्दै भने, "उनीहरूको कार्यबिना मृत्यु हुनेको सङ्ख्या उल्लेखनीय रूपमा बढी हुने थियो।"

लस एन्जलस डिपार्टमेन्ट अफ वाटर एन्ड पावरका प्रमुख जेनिस क्विनोनेसले पानीको सीमित स्रोतको कारण पानीको जथाभावी प्रयोग नगर्न आग्रह गरेका छन्। अमेरिकाका नवनिर्वाचित राष्ट्रपति डोनाल्ड ट्रम्पले सामाजिक सञ्जालमार्फत राज्यको वातावरणीय नीतिले पानीको अभाव निम्त्याएको दाबी गरेका छन्।

अमेरिकी राष्ट्रपति जो बाइडेनले डढेलो नियन्त्रणका लागि केन्द्रीय स्रोत र साधन व्यवस्थापनमा ध्यान केन्द्रित गर्ने बताएका छन्। डढेलोका कारण उनले इटालीको लागि तय भएको आफ्नो भ्रमण रद्द गरेका छन्। "हामी डढेलो नियन्त्रण गर्न सक्दो प्रयास गरिरहेका छौं," बाइडेनले भने।

अमेरिकाको लस एन्जल्सको जंगल

प्रकाशित मिति: बिहिबार, पुस २५, २०८१, २:०६ बेलुका

लेखक: समाचारपाटी