सूर्य नेपाल प्रिमियर गल्फ च्याम्पियनसिप सोमवारदेखि गोकर्ण गल्फ क्लवमा हुने भएको छ । सूर्य नेपाल गल्फ टुर २०२४–२५ को अन्तिम प्रतियोगितासमेत रहेको सूर्य नेपाल प्रिमियर गल्फ सोमवारदेखि हुन लागेको हो । आयोजक प्रोफेसनल गल्फर एशोसिएशन अफ नेपालले त्रिपुरेश्वरस्थित नेपाल खेलकुद पत्रकार मञ्चमा आईतवार पत्रकार सम्मेलन आयोजना गर्दै प्रतियोगिताको बारेमा जानकार दियो । बिहीवारसम्म चल्ने प्रतियोगिता ७२ होलको प्रतिष्पर्धा हुने प्रोफेसनल गल्फर एशोसिएशन अफ नेपालका महासचिव दीपक आचार्यले जानकारी दिए । ३६ होलपछि कट लागू गरिनेछ । शिर्ष २१ प्रो तथा कट बनाउने एमेच्योर गल्फले अन्तिम ३६ होलका लागि प्रतिष्पर्धा गर्न पाउनेछन् । च्याम्पियनसिपमा ३८ प्रो तथा १५ एमेच्योर गल्फरले प्रतिष्पर्धा गर्नेछन् । विजेताले तीन लाख तथा उपविजेताले एक लाख ८५ हजार रुपैयाँ प्राप्त गर्नेछन् । तेस्रोदेखि पाँचौं स्थानमा रहनेलाई क्रमाशः एक लाख २५ हजार, एक लाख पाँच हजार र ९२ रुपैयाँ प्रदान गरिनेछ । शीर्ष २१ भित्र पर्ने सबै गल्फरले नगद पुरस्कार पाउने  आयोजकले जनाएको छ ।

यस प्रतियोगितमा प्रोफेसनल गल्फर नीरज तामाङ, तोरण शाही, भुवन नगरकोटी, शुक्रबहादुर राई र सुवास तामाङलाई एमच्योर गल्फर सद्भावन आचार्य र राहुल विश्वकर्माले चुनौती दिने अनुमान गरिएको छ । यस च्याम्पियनसिपमा भुटानका भुटानका शिर्ष एमेच्योर निमदोर्जी तामाङले पनि सहभागिता जनाउने आयोजकले जनाएको छ । च्याम्पियनसिपपछि शनिवार प्रो–एम स्पर्धा हुनेछ ।

—न्युज एजेन्सी नेपाल

गोकर्ण गल्फ क्लव

प्रकाशित मिति: आइतवार, असार १, २०८२, ४:१७ बेलुका

लेखक: समाचारपाटी