काठमाडौं । सुनसरीको देवानगञ्जमा दुई जनालाई गोली प्रहार गरेको घटनामा संलग्न रहेको आरोपमा दुई जना पक्राउ परेका छन् । प्रहरी स्रोतकाअनुसार पक्राउ पर्नेहरूमा देवानगञ्ज–१ का २७ वर्षीय रवीनकुमार यादव र सोही ठाउँका २१ वर्षकै पिन्टु यादव छन् । उनीहरूमाथि प्रहरीले अनुसन्धान अघि बढाइरहेको छ ।

यता कोशी प्रदेशका प्रहरी प्रमुख डीआईजी राजन अधिकारीले घटनाको अनुसन्धान भइरहेको बताउँदै आरोपितहरूको पहिचान भइरहेको बताएका छन् । ‘गोली प्रहार गर्नेहरूको पहिचान भइसकेको छ । ५र६ जनाको समूहको संलग्न देखिन्छ । हामी अनुसन्धान गरिरहेका छौं,’ डीआईजी अधिकारीले भन्नुभयाे ।

गोली प्रहार घटनामा प्रयोग भएको मोटरसाइकल र गाडी समेत नियन्त्रणमा लिइएको अधिकारीले बताउनुभयाे । सोमबार साँझ गोली प्रहारबाट देवानगञ्ज गाउँपालिका–७ का २१ वर्षीय शिवकुमार मेहता र पिन्टु मेहता घाइते भएका थिए ।

सोमबार साँझ मोटरसाइकलमा यात्रा गरिरहेका बेला शिवकुमार र पिन्टुमाथि देवानगञ्ज बजारमा गोली प्रहार भएको थियो ।शिवकुमारको ढाडदेखि तल दायाँतर्फ र बायाँ कम्मरको भागमा गोली लागेको थियो । सुनसरीका प्रमुख प्रहरी उपरीक्षक सुमन तिम्सिनाले सोमबार साँझको घटनामा तीन जना घाइते भएका छन् । उहाँका अनुसार दुई जनालाई गोली लागेको हो भने एकजना लडेर घाइते भएका हुन् । देवानगञ्ज सुनसरीस्थित नेपाल–भारत सीमावर्ती क्षेत्रमा पर्छ ।

प्रकाशित मिति: मङ्लबार, बैशाख २, २०८२, २:०९ बेलुका

लेखक: समाचारपाटी