जलन पीडितहरुले औषधि उपचारमा सहज हुनेगरी आवश्यक परिचय पत्रको व्यवस्था गरिदिन सरकारसँग माग गरेका छन् । 
आईतवार एमालेले ललितपुरको च्यासलस्थित पार्टी केन्द्रिय कार्यालयमा सो कानुन सार्वजनिक गरेको दिनको स्मरणमा आयोजित कार्यक्रममा बोल्दै पीडितहरुले तेजावबिरुद्ध कडा कानून ल्याएकोमा तत्कालीन केपी ओली नेतृत्वको सरकारप्रति आभार व्यक्त गरेका हुन् । केपी ओली नेतृत्वको तत्कालीन सरकारले २०७७ साल भदौं २५ गते नेपालमा तेजावबिरुद्धको कडा कानून बनाएकोमा खुशी व्यक्त गर्दै पीडितहरुले सो सरकारलाई धन्यवाद दिए । पीडित  मुस्कान खातुनले आफूहरुले भेटेको १५ दिन भित्र तेजाव आक्रमणबिरुद्ध कडा कानून ल्याएको भन्दै तत्कालिन प्रधानमन्त्री केपी शर्मा ओलीप्रति आभार गर्नुभयो । उहाँले आफूहरुलाई औषधि उपचारमा सहज हुनेगरी आवश्यक परिचय पत्रको व्यवस्था गरिदिन पनि सरकारसँग माग गर्नुभयो । 
खातुनले भन्नुभयो, ‘हामीले तत्कालीन प्रधानमन्त्री केपी शर्मा ओलीसँग भेटेका थियौं । तेजावबिरुद्ध कानूनको पनि कुरा गरेका थियौं । मलाई पूरै विश्वास थियो कि उहाँले कानून लिएर आउनु हुन्छ । र, हाम्रो कुरा छिट्टै सुनेर १५ दिन भित्र नै भदौं २५ गते कानून पनि आयो । त्यसले मलाई अत्यन्तै धेरै खुशी लाग्यो । त्यो कानुन अत्यन्तै राम्रो कानुन पनि आएको छ । यो कानून आयएता तेजाब आक्रमणको घटना अलि कम नै देखिएको छ । अहिले पनि हामीले अवार्नेस कार्यक्रम अहिले पनि गाउँघरमा गर्न एकदमै जरुरी छ । कानून आयो, हामीलाई धेरै प्रकारको सुविधा पनि भयो । हामीलाई परिचय पत्र दिएर त्यसै अनुसार औषधिको व्यवस्था गरिदिए हुन्थ्यो । यो कानून बनाउनु भएकोमा हाम्रो बालाई धेरै धन्यवाद भन्न चाहन्छु । उहाँले हाम्रो पीडा सुनेर १५ दिन भित्र नै कानून ल्याउनु भनेको एकदमै ठूलो काम हो ।’

राष्ट्रिय स्वतन्त्र पार्टीका सांसद समेत रहनुभएकी तेजाव आक्रमण पीडित विन्दबासिनी कंसाकारले तेजाव बिरुद्ध कडा कानून बनाउने काम गरेको भन्दै ओली नेतृत्वको तत्कालिन सरकारलाई धन्यवाद दिनुभयो । उहाँले सो कानुनको कार्यान्वयन गर्न भने सरकारलाई सचेत गराउनु भयो । उहाँले आफूले पनि सांसदको रुपमा र आफ्नो पार्टीले पनि सो कानूनको प्रभावकारी कार्यान्वयनका लागि पहल गर्ने प्रतिवद्धता समेत व्यक्त गर्नुभयो । 

कंसाकारले भन्नुभयो, ‘अरु रोगभन्दा जलन र तेजाव आक्रमण भनेको गम्भिर अपरोध हो । यो हामी माथि त भयो । तर हामीले के चाहन्छौं भने यस्तो अपराध नेपालमा मात्र होइन, विश्वमा केहीँ पनि नहोस् । नेपालमा ६० देखि ७० हजार मान्छे वर्षमा जल्ने गर्दछ । तर उहाँहरुको उपचारको लागि केही पनि छैन । विगतमा जुन कानून बनेको छ । त्यो कानुन नेपालको लागि पर्याप्त छ । तर त्यो कानुन कार्यान्वयनमा आएको छैन् । र, म प्रतिनिधि सभा सदस्य भएको नाताले त्यो कानूनलाई कार्यान्वयनमा लिएर आउन म व्यक्तिगत रुपमा र प्रतिनिधिसभा सदस्यको रुपमा र मेरो पार्टी राष्ट्रिय स्वतन्त्र पार्टीको तर्फबाट पनि पहल गर्नेछु । र, आगामी दिनमा पनि पहल गरिरहनेछु । र, हाम्रो पूर्वप्रधानमन्त्रीज्यूले आजको दिनलाई सम्झिदिनु भएकोमा र तेजावबिरुद्ध कानून बनाउनु भएकोमा धेरैधेरै धन्यवाद ।’ 

उनीहरुले जलन पीडित सबैलाई उत्तिकै साथ दिन पनि सरकारलाई आग्रह पनि गरेका छन । जलन पीडित जेनी खड्काले तेजाव आक्रमणलाई मात्र नभई जलन पीडित सबैलाई समान व्यवहार गरिदिन आग्रह गर्नुभयो । उहाँले आफूहरुका लागि औषधि उपचारमा सहज हुने गरी आवश्यक व्यवस्था पनि मिलाउनुपर्ने बताउनु भयो । पीडित खड्काले भन्नुभयो, ‘सम्बन्धि सबै रोगीहरुलाई विशेष व्यवस्था गरिदिनु पर्दछ । उनीहरुका लागि औषधिपनि सहज ढंगले दिने व्यवस्था हुनुपर्यो ।’

केपी ओली नेतृत्वको सरकारले पीडितहरुसँग छलफल गरी २०७७ साल भदौ २५ गते अर्थात् आजनै दिन तेजाव आक्रमणबिरुद्ध कडा कानून निर्माण गरेको थियो । सोही दिनलाई एमालेले तेजाव आक्रमणबिरुद्ध जागरण दिवसको रुपमा मनाउने अभियान अन्तरगत पीडितहरुलाई भेला गरी उनीहरुको गुनासो सुनुवाई गरेको हो ।

जलन पीडित

प्रकाशित मिति: मङ्लबार, भदौ २६, २०८०, १२:४० बेलुका

लेखक: समाचारपाटी