काठमाडौं I सुदूरपश्चिम रोयल्सले नेपाल प्रिमियर लिग (एनपीएल) मा जनकपुर बोल्ट्सलाई १२४ रनको लक्ष्य प्रस्तुत गरेको छ। कीर्तिपुरस्थित त्रिभुवन विश्वविद्यालय अन्तर्राष्ट्रिय क्रिकेट मैदानमा टस हारेर पहिले ब्याटिङ गरेको सुदूरपश्चिमले २० ओभरमा ९ विकेट गुमाउँदै १२३ रन बनायो।

सुदूरपश्चिमका लागि विनोद भण्डारीले सर्वाधिक ३३ रनको योगदान दिए। सैफ जैबले २१, इशान पाण्डेले १७ र ब्राण्डन म्याकमुलेनले ११ रन बनाए। अन्य ब्याटर भने प्रभाव जमाउन असफल भए।

५५ रनमा पहिलो विकेट गुमाएपछि सुदूरपश्चिमको इनिङ्स धरमरायो। सैफ जैब र विनोद भण्डारीले पहिलो विकेटका लागि ५५ रनको साझेदारी गरे। तर, हर्श थाकरले आठौं ओभरमा यो साझेदारी तोडेपछि सुदूरले लगातार विकेट गुमाउन थाल्यो।

डेब्यु खेलाडी हर्मित सिंह १ रनमा आउट भए भने कप्तान दीपेन्द्र सिंह ऐरी शून्यमा पभेलियन फर्किए। आरिफ शेखले ६, स्कट कुगेलेइनले ७ र नरेन साउदले ३ रन मात्र बनाउन सके। नरेश बुढाएर भने ९ रनमा अविजित रहे।

जनकपुर बोल्ट्सका किशोर महतोले सानदार बलिङ गर्दै ४ ओभरमा ३५ रन खर्चेर ४ विकेट लिए। शेर मल्लले ४ ओभरमा १९ रन खर्चेर २ विकेट हात पारे। अरनिको यादवले ३ ओभरमा १६ रन खर्चेर २ विकेट लिएका थिए।

अब जनकपुर बोल्ट्सले १२४ रनको लक्ष्य पछ्याउँदै जित हासिल गर्ने प्रयास गर्नेछ।

एनपीएलनेपाल प्रिमियर लिग

प्रकाशित मिति: बुधबार, मंसिर २६, २०८१, ११:१७ बिहान

लेखक: समाचारपाटी