काठमाडौं I सेयर बजारको परिसूचक नेप्से मंगलबार १७.८० अंकले वृद्धि भएर २,७७५ अंकमा पुगेको छ। परिसूचक बढेपनि कारोबार रकम घटेको छ। यस दिन ८ अर्ब ५२ करोड रुपैयाँ बराबरको कारोबार भयो, जुन अघिल्लो दिनको १० अर्ब ५४ करोडको तुलनामा कम हो।

बजारमा १४२ कम्पनीको सेयर मूल्य वृद्धि हुँदा ९७ कम्पनीको घट्यो भने ५ कम्पनीको स्थिर रह्यो। समूहगत रूपमा फाइनान्स, हाइड्रोपावर, जीवन बीमा, व्यापार, र अन्य समूहमा वृद्धि देखियो। फाइनान्स १.३९%, हाइड्रोपावर १.८५%, जीवन बीमा १.५२%, व्यापार ५.९६% र अन्य ०.२७% ले बढेका छन्। तर, बैंकिङ, विकास बैंक, होटल तथा पर्यटन, लगानी, माइक्रोफाइनान्स, र निर्जीवन बीमा समूह क्रमशः ०.१९%, ०.३७%, १.७१%, ०.४१%, ०.३२%, र ०.५२% ले घटेका छन्।

यस दिन ४ हाइड्रोपावर कम्पनीको सेयर मूल्य १०% ले वृद्धि भएको छ, जसमा दिव्यश्वरी हाइड्रोपावर, इङ्वा हाइड्रोपावर, खानीखोला हाइड्रोपावर, र जोशी हाइड्रोपावर परेका छन्। यस्तै, ङादी ग्रुप पावरको ८.६%, शिवश्री हाइड्रोको ८.१% र छ्याङ्दी हाइड्रोको ७.३% ले वृद्धि भएको छ। अघिल्लो दिनसम्म १०% ले वृद्धि भइरहेको विशाल बजार कम्पनीको यस दिन पनि ६.४% ले वृद्धि भई प्रतिकित्ता मूल्य ७,०१५ रुपैयाँ पुगेको छ।

त्यसैगरी, अपर स्याङ्गे हाइड्रोपावरको ९.५%, जानकी फाइनान्सको ६.१%, र गुराँस लघुवित्तको ३.४% ले गिरावट आएको छ। कारोबार रकमका आधारमा ङादी ग्रुप, जानकी फाइनान्स, एनआरएन इन्फ्रास्ट्रक्चर, बेस्ट फाइनान्स, र एनआईसी एसिया बैंक अग्रस्थानमा रहे। बजार परिसूचकको वृद्धिले लगानीकर्तामा उत्साह थपे पनि कारोबार रकमको गिरावटले लगानी रणनीतिमा पुनर्विचार गर्नुपर्ने संकेत दिएको छ।

सेयर बजार

प्रकाशित मिति: मङ्लबार, मंसिर १८, २०८१, ३:२१ बेलुका

लेखक: समाचारपाटी