श्री पशुपति हिन्दु विश्वविद्यालय स्थापना तयारी समितिले संस्कृति, पर्यटन तथा नागरिक उड्डयनमन्त्री सुदन किराँतीलाई विश्वविद्यालय अध्ययन प्रतिवेदन बुझाएको छ ।

आईतवार सिंहदरबारस्थित मन्त्रालयमा समितिले श्री पशुपति हिन्दु विश्वविद्यालय स्थापना अध्ययन प्रतिवेदन मन्त्री किराँतीलाई बुझाएको हो । प्रतिवेदन बुझाउँदै समिति सदस्यसचिव घनश्याम खतिवडाले ट्रस्टी मोडलमा विश्वविद्यालय बनाउने बताउनु भयो । उहाँले नेपालमा प्रचलित शास्त्रीय संस्कार, संस्कृति र दर्शनका साथै नेपालका विभिन्न जातजातिमा प्रचलित धर्म, दर्शन र लोकसंस्कृतिको अध्ययन, अनुसन्धानलाई मुख्य लक्ष्य बनाएर स्थापना गरिने विश्वविद्यालयको नेपालमुखी अध्ययन प्रमुख उद्देश्य रहेको बताउनु भयो । उहाँले नेपालको जनजीवन र माटोलाई चिनेको दक्ष एवं स्वावलम्वी जनशक्तिको उत्पादन गर्नु नै विश्वविद्यालयको लक्ष्य रहेको बताउनु भयो । 

उहाँले भन्नुभयो, ‘ट्रस्टी मोडलमा विश्वविद्यालय बनाउने सोच यो समितिले तय गरेको छ । नेपालमा प्रचलित शास्त्रीय संस्कार, संस्कृति र दर्शनका साथै नेपालका विभिन्न जातजातिमा प्रचलित धर्म, दर्शन र लोकसंस्कृतिको अध्ययन, अनुसन्धानलाई मुख्य लक्ष्य बनाएर स्थापना गरिने यस विश्वविद्यालयको नेपालमुखी अध्ययन हो । नेपालको जनजीवन र माटोलाई चिनेको दक्ष एवं स्वावलम्वी जनशक्तिको उत्पादन हो । ओंकार भित्रका सम्पूर्ण विषय, संस्कृति, कला र दर्शनलाई नेपाली माटोको वास्तविकतासँग जोडेर विश्वका अनुसन्धानकर्ता एवं अध्येतालाई यसतर्फ आकर्षित गर्दै नेपाली पन र नेपाली मन दिएर राष्ट्र विकासमा लागिपर्ने, राष्ट्रवादी जनशक्ति तयार गर्ने वृहत उद्देश्यकासाथ स्थापन हुन लागेको विश्वविद्यालय नितान्त नेपालको पहिचान विश्व परिदृश्यमा स्थापित गरी विश्वलाई नेपालतर्फ आकर्षित गर्नसक्ने गुणस्तरीय विश्वविद्यालय बन्नेछ । पशुपति क्षेत्र विकास कोषको प्रश्तावित गुरुयोजनामा भगवान श्री पशुपतिनाथका नामबाट शिक्षा, स्वास्थ्य र समाजसेवाका क्षेत्रमा कार्य गर्न कोषलाई निर्देश गरेको सन्दर्भले समेत पशुपति क्षेत्र विकास कोषको स्वामित्वमा रहेको गोठाटारस्थित जम्कामा विश्वविद्यालय स्थापना गर्न आवश्यक र उपयुक्त भएकाले सो सम्बन्धित निर्णय गर्न पशुपति क्षेत्र विकास कोष सञ्चालक समितिसमक्ष अनुरोध गरिएको छ ।’

समिति संयोजक डा.जगमान गुरुङले ८ दिनपछि जग्गाको कित्ताकाट भएसँगै ८५ प्रतिशत काकम सम्पन्न हुने बताउनु भयो । उहाँले कानूनको मस्यौदा आएपछि र विभिन्न विज्ञहरुले सुझाव दिएसँगै विश्वविद्यालय स्थापनाको कार्यविधि शतप्रतिशत सम्पन्न हुने बताउनु भयो । उहाँले श्री पशुपति हिन्दु विश्वविद्यालयको कारणबाट विश्वलाई नेपालप्रति आकर्षित गर्ने बताउनु भयो ।  

संयोजक डा.जगमान गुरुङ रहेको समितिमा सदस्यहरुमा प्रा.डा. रामचन्द्र गौतम, प्रा. चेतोनाथ गौतम, कमल ढकाल, डा. घनश्याम खतिवडा सदस्यसचिव, प्रा.डा. प्रेमकुमार खत्री रहनुभएको थियो ।

—न्युज एजेन्सी नेपाल

उड्डयनमन्त्री सुदन किराँती

प्रकाशित मिति: आइतवार, माघ ७, २०८०, ६:०१ बेलुका

लेखक: समाचारपाटी