काठमाडौं । नेपालमा घुम्नका लागि बंगलादेशबाट सात सय पर्यटक नेपाल आएका छन् ।  उनीहरू जहाज चार्टर्ड गरेर शुक्रबार काठमाडौं आएका हुन् । नेपाल भ्रमणमा आएका बङ्गलादेशी पर्यटकलाई त्रिभुवन बिमानस्थलमा नेपाल पर्यटन बोर्डले पञ्चेबाजासहित स्वागत गरेको थियो । 

नेपाल आउने बंगलादेशी पर्यटकलाई नेपालको सम्राट टुर एन्ड ट्राभल्स प्रालिले व्यवस्थापन गरेको छ । बंगलादेशको ढाकामा रहेको माउन्टेन क्लबमार्फत् नेपाल आएका बंगलादेशी पर्यटकहरूले ऐतिहासिक सम्पदाको भ्रमण गर्ने तय भएको छ । 

नेपालबाट नजिक दूरीमा रहेको बंगलादेश पर्यटकीय सम्भावना बोकेको गन्तव्य मुलुक हो । ठूलो संख्यामा नेपाल भित्रिने बंगलादेशी पर्यटकको प्रचार–प्रसारबाट थप पर्यटक आकर्षण गर्न मद्दत पुग्ने विश्वास पर्यटन बोर्डको छ । 

बङ्गलादेशमा रहेको माउन्टेन क्लब टुर्स एण्ड ट्राभल्सका प्रमुख रिजाउल हकिम सान्तुले बङ्गलादेश प्राकृतिक रुपमा सुन्दर रहेकाले भ्रमणका लागि नेपाल आएको बताउनुभयाे । चार रात पाँच दिन नेपालमा बिताउँदा भक्तपुर, नगरकोट, धुलिखेल लगायतका पर्वतीय क्षेत्रमा जाने र सम्मेलनको समेत आयोजना गरिएको उहाँले बताउनुभयाे।

पर्यटन बोर्डका अनुसार सन् २०२३ मा हालसम्म बंगलादेशबाट करिब १३ हजार छ सय पर्यटक नेपाल आएका छन् । 

जहाज चार्टर्डपर्यटकबंगलादेश

प्रकाशित मिति: शुक्रबार, भदौ १, २०८०, ३:०५ बेलुका

लेखक: समाचारपाटी