नेकपा (एमाले) का वरिष्ठ उपाध्यक्ष ईश्वर पोखरेलले संविधानलाई प्रभावकारी ढंगले कार्यान्वयन गर्नुपर्ने बताउनुभएको छ ।बुधवार संविधान दिवसको अवसर पारेर जनकपुरको जानकी मन्दिरमा आयोजित वृक्षारोपण, सरसफाई र झण्डोत्तोलन कार्यक्रमपछि सञ्चारकर्मीमाझ उहाँले सो कुरा बताउनुभएको हो । वरिष्ठ उपाध्यक्ष पोखरेलले संविधानको प्रभावकारी कार्यान्वयनका लागि त्यस अनुसारको कानून र संरचना निर्माणको काममा जोड दिनुपर्ने आवश्यक्ता पनि औंल्याउनु भयो । उहाँले नेपाली जनताका प्रतिनिधिहरु आफैँले बनाएको हुनाले संविधानप्रति सबै नेपालीले गर्व गर्नुपर्ने तर्क समेत गर्नुभयो । वरिष्ठ उपाध्यक्ष पोखरेलले सबै राजनीतिक दलहरुको सहमतीमा संविधानलाई संशोधन गरेर अघि बढ्न सकिने स्पष्ट पार्नुभयो । जनताको समस्या समाधानका लागि संविधान बनेकाले त्यसलाई उनीहरुको चाहनाअनुसार संशोधन गर्दै लैजान सकिने उहाँको भनाई थियो । 

वरिष्ठ उपाध्यक्ष पोखरेलले भन्नुभयो, ‘सबैभन्दा पहिले नेपाली जनताका प्रतिनिधिहरुले बनाएको यो संविधानप्रति हामी सबैले गर्व गर्नुपर्छ । यो कुनै बाहिरी शक्तिले लादेर ल्याएको संविधान होइन । नेपालका जनता, विभिन्न जातिका, विभिन्न भाषाका, विभिन्न धर्म, संस्कृतिका, भौगोलिक क्षेत्रलाई प्रतिनिधित्व गर्ने जनप्रतिनिधिहरुको अत्याधिक ठूलो संख्याबाट निर्माण भएको संविधान हो । हामीले त्यसप्रति गर्व गर्नुपर्र्छ । यो संविधान वास्तवमा धेरै कुरामा उत्कृष्ट छ । र, हामीले जस्तो चुनौतिको बीचमा संविधान निर्माण गर्यौं । त्यो संविधानप्रति हामीले गर्व गर्नुपर्छ । र, यो संविधानलाई प्रभावकारी ढंगले कार्यान्वयन गर्नुपर्छ । यो संविधानमा रहेका केही कमी छन् भने, कमजोरी छन् भने यसलाई प्रक्रियाबाट भोली सच्याउनुपर्ने, संशोधन गर्नुपर्ने कुराहरु पनि छ । संविधान भनेको गतिशील दस्तावेज हो । यो एकचोटी बनेपछि कहिल्यै संशोधन नहुने होइन । आवश्यक्ता अनुसार संशोधन हुन्छ । जनताको चाहना अनुसार संशोधन हुन्छ । संविधानले जनताको समस्यालाई सम्बोधन गर्नुपर्ने भएको हुनाले संविधानले गतिशील दस्तावेजको रुपमा भुमिका खेल्छ । यस पटक हामीले संविधान दिवस मनाईरहँदा यसलाई कार्यान्वयन गर्ने प्रतिवद्धता हामीले व्यक्त गर्नुपर्छ । नयाँ ढंगले यसलाई कार्यान्वयन गर्नुपर्ने आवश्यक्ता छ । कतिपय कुरा यसमा सुधार गर्नुपर्नेछ भने पनि राजनीतिक नेतृत्व तहमा छलफल गरेर सहमतीका साथ, सहमतिका साथ बनेको संविधान हो । सहमतिकै आधारमा संशोधन पनि गर्न सकिन्छ । यस हिसावले जानुपर्छ । र, आजको आवश्यक्ता भनेको हाम्रो संविधानलाई प्रभावकारी ढंगले कार्यान्वयन गर्ने कुरा आजको आवश्यक्ता हो । आजको अवधिमा यसको कार्यान्वयन नापेर यति डिग्री भयो भन्ने खालको कुरा भएन । संविधान आफै कार्यान्वयन हुँदैन । संविधानलाई कार्यान्वयन गर्नका लागि त्योसँग मिल्ने हिसावले कानुनहरु परिवर्तन गर्नुपर्छ । संरचना परिवर्तन गर्नु पर्छ । हामीले कानुन निर्माण गर्ने आफ्नो विधि हुन्छ । कुनै आदेश दिएर त कानून बनि हाल्दैन । त्यो त जनताका निर्वाचित प्रतिनिधिहरुले संसदीय प्रक्रिया भित्रबाट कानुन बनाउने हो । सबैभन्दा चुनौतिको कुरा के हो भने संविधानत जारी गर्यौं । जारी भएको संविधानलाई कार्यान्वयन गर्नका लागि हामीसँग पहिलो कुरा कानुनको आवश्यक्ता पर्छ । नयाँ संविधान अनुरुप कानून बनाउनु पर्यो । कानुन बनाएर मात्रै भएन, संरचनाहरु बनाउनु पर्यो । यो काममै हाम्रो धेरै समय बितेको छ । अझै कानूनहरु बनाउन पनि बाँकि छन् । र, संरचनाहरु बनाउनु पर्छ । तवमात्रै हामी संविधानलाई प्रभावकारी ढंगले कार्यान्वयन गर्न सक्छौं ।’

वरिष्ठ उपाध्यक्ष पोखरेलले संविधान अनुकुल हुने गरी कानून निर्माणको काममा ढिलाई गर्न नहुने पनि दोहोर्याउनु भयो ।

ईश्वर पोखरेलसंविधान

प्रकाशित मिति: बिहिबार, अशोज ४, २०८०, १०:४१ बिहान

लेखक: समाचारपाटी