राष्ट्रिय स्वतन्त्र पार्टीका प्रमुख सचेतक सन्तोष परियारले कसैले परिकल्पना गरेको कुरा लागू गर्न संविधान संशोधन गर्नेकुरा स्वीकार्य नहुने बताउनुभएको छ ।

ललितपुरमा शनिवार आयोजित एक कार्यक्रमलाई सम्बोधन गर्दै उहाँले यस्तो बताउनुभएको हो । उहाँले संविधान निर्माण गरिरहँदा प्रत्येक १० वर्षमा यसको पुनरावलोकन गर्ने विषय समेटिएको तर संविधान नै पूर्ण कार्यान्वयन हुन नसकेको उल्लेख गर्नुभयो । उहाँले इमान्दारिताका साथ संविधान संशोधन गर्न खोजेको भए रास्वपाको साथ रहने बताउनु भयो । उहाँले राजनीतिक संस्कार स्थायी हुन जरुरी रहेको बताउनु भयो । उहाँले दुई तिहाई बहुमत ल्याउन निर्वाचनले कुनैपनि राजनीतिक दललाई नरोेकेको बताउनु भयो । 

उहाँले भन्नुभयो, ‘हामीले संविधान निर्माण गरिरहँदा प्रत्येक १० वर्षमा यसको पुनरावलोकन गर्ने भन्ने थियो । पहिलो कुरा त हामीले संविधानको कार्यान्वयन नै गरेनौँ । देशमा यत्रा ठूला संघर्ष भएका थिए, ति कुराहरुमा हामीले कार्यान्वयनका लागि कानून नै बनाएनौँ । यो संविधान अहिले ९ वर्षमा चलिरहेको छ । मलाई विश्वास त छैन, सात बुँदामध्ये २ नम्बर बुँदामा संविधान संशोधन राखेर नेकपा एमाले र नेपाली काँग्रेसको गठबन्धन बन्यो । इमान्दारिताका साथ गर्न खोजेको हो भने हामीले त्यसलाई स्वीकार गरेका छौँ । संविधानअनुसार काम गर्न कहाँ कहाँ अफ्ठ्यारो थियो, स्थायित्वको कुरा गर्ने हो भने २०१५,२०४८,२०५६ साल, २०७४ सालसम्म  बहुमतको सरकार थियो । ति टिकेकनन् । कुनैपनि टिकेनन् । बरु नभएका सरकारहरु टिकेका छन् । कतिमा त संसद नै पनि खाइदिए । हाम्रो प्रवृत्ति स्थायी छैन । राजनीतिक संस्कार स्थायित्व छैन, कोही पार्टीहरुलाई चाहियो भनेर स्थायित्व जबरजस्ती हुँदैन । दुई तिहाई बहुमत पनि आउनसक्छ । तदनुरुपको विचार हुनुपर्छ । राजनीतिक मुद्दा हुनुपर्छ । निर्वाचन प्रणालीले बहुमत र अल्पमतमा लैजाने भन्ने होइन । मुख्य कुरा विचार हो । जनताका मुद्दा हुन् । कुनै पार्टीलाई आजको संविधानले बहुमत ल्याउन कतै रोकेको छैन । संविधान संशोधन गर्नुपर्छ तर पार्टीको प्रवृत्ति, चरित्र र व्यक्तिको प्रवृत्ति, चरित्र बदल्नुपर्छ । व्यक्तिको पनि संविधानतः चरित्र हुनुपर्छ, समावेशी हुनुपर्छ । संविधानले परिकल्पना गरेको कुरा केही पनि नगर्ने अनि आफूले परिकल्पना गरेको कुरा लागू गर्न संविधान संशोधन गर्नुपर्ने ? सबैभन्दा खतरनाक कुरा यो हो ।’

प्रमुख सचेतक परियारले संविधान संशोधन गर्नुपर्ने तर त्यस भन्दा पहिला व्यक्ति र राजनीतिक दलको प्रवृत्ति र चरित्र बदल्नुपर्ने जरुरी रहेको बताउनु भयो ।

—न्युज एजेन्सी नेपाल

राष्ट्रिय स्वतन्त्र पार्टीसन्तोष परियार

प्रकाशित मिति: शनिबार, फाल्गुन ३, २०८१, ३:१५ बेलुका

लेखक: समाचारपाटी