काठमाडौं I सहकारी ठगी प्रकरणमा पक्राउ परेका राष्ट्रिय स्वतन्त्र पार्टी (रास्वपा) का सभापति रवि लामिछानेलाई चितवनमा बयान सकेर बुधबार राति पोखरा लगिएको छ। अब उनलाई थप अनुसन्धानका लागि पर्साको वीरगञ्ज लैजाने तयारी भइरहेको छ।

चितवन जिल्ला सरकारी वकील कार्यालयमा मंगलबार र बुधबार गरी लामिछानेसँग दुई दिन बयान लिइएको थियो। उनीमाथि चितवनको साहारा चितवन बहुउद्देश्यीय सहकारी संस्थाको बचत रकम हिनामिना गरेको आरोप लागेको छ।

लामिछाने बयान दिइरहेका बेला चितवनमा उनका समर्थकले प्रदर्शन गरेका थिए। प्रदर्शनका क्रममा सुरक्षाकर्मी र प्रदर्शनकारीबीच झडपसमेत भएको थियो।

लामिछानेमाथि गोर्खा मिडिया प्रालिका सञ्चालक, सेयर होल्डर तथा प्रबन्ध निर्देशकको हैसियतमा विभिन्न सहकारीको रकम हिनामिना गरेको आरोप लागेका छन्। सहकारी ठगी प्रकरणमा उनीसँग चितवनलगायत कास्की, रुपन्देही र काठमाडौंमा पनि बयान लिइसकिएको छ।

जिल्ला अदालत पर्साले वीरगञ्जको सानो पाइला सहकारीको बचत अपचलनसम्बन्धी अनुसन्धानका लागि लामिछानेसहित पूर्वडीआईजी छविलाल जोशी, जीबी राई, र रामबहादुर खनालविरुद्ध पक्राउ पूर्जी जारी गरेको छ। यही आधारमा प्रहरीले लामिछानेलाई पोखराबाट वीरगञ्ज लैजाने तयारी गरेको छ।

यो घटनाले सहकारी क्षेत्रको विश्वसनीयतामा गम्भीर प्रश्न उठाएको छ भने लामिछानेका समर्थकले उनलाई राजनीतिक षड्यन्त्रमा तानिएको आरोप लगाइरहेका छन्।

रवि लामिछानेरवि लामिछाने पोखराबाट वीरगञ्ज लैजाने तयारी

प्रकाशित मिति: बिहिबार, मंसिर २०, २०८१, ११:०९ बिहान

लेखक: समाचारपाटी