सत्तारुढ प्रमुख घटक नेकपा (एमाले) का महासचिव शंकर पोखरेलले मुलुकलाई नयाँ नभई बलियो राजनीतिक शक्ति आवश्यकता रहेको बताउनुभएको छ ।

महासचिव पोखरेलले राष्ट्रिय स्वतन्त्र पार्टी (रास्वपा) प्रति लक्षित गर्दै नयाँ र पुरानो राजनीतिक पार्टीहरुको बहसले मुलुकमा राजनीतिक अस्थिरतालाई नै मलजल गरिरहेको जिकिर समेत गर्नुभयो । पार्टीको ललितपुर जिल्ला कमिटीले शुक्रवार गरेको एक कार्यक्रममा बोल्दै उहाँले मुलुकमा नयाँ नयाँ प्रयोग नभई बलियो राजनीतिक शक्तिको निर्माण गर्नु राष्ट्रिय आवश्यकता भएको तर्क समेत गर्नुभयो । महासचिव पोखरेलले मुलुकको विकास र समृद्धिको नेतृत्व गर्न पनि बलिया राजनीतिक शक्तिहरुको विकल्प नभएको दोहो¥याउनु भयो । उहाँले अमेरिका, चीन, भारत, बेलायत लगायतका देशहरुको दृष्टान्त पेश गर्दै विकास र समृद्धिको प्रश्न अगाडि आउँदा बलिया राजनीतिक दलहरुको मात्रै त्यसलाई नेतृत्व गर्न सकेको बताउनु भयो । मुलुकको विकास र समृद्धिको आधारशिला बलिया र ठूला राजनीतिक दलहरुबाट मात्रै सम्भव रहेको महासचिव पोखरेलको भनाई थियो । 
उहाँले भन्नुभयो, ‘हामी हाम्रो मुलुक भित्र नयाँ र पुरानोको बहस गरेर के गरिरहेका छौं ? मुलुकमा राजनीतिक अस्थिरतालाई मलजल गरिरहेका छाैँ । जे समस्या हो, त्यो समस्यालाई विस्तार गरिरहेका छौं । समस्या हल गर्ने दिशामा हाम्रो ध्यान केन्द्रित हुन सकिराखेको छैन । त्यस अर्थमा अव हामीले भन्न सक्नु पर्दछ–जनताका बीचमा अव नयाँ नयाँ प्रयोग होइन । धेरै राजनीतिक दलहरुका बीचमा जनमतलाई विभाजित गर्ने होइन । अब राष्ट्रको आवश्यकता जनमतको धुव्रीकरण, राजनीतिक दलहरुको ध्रुबीकरण, बलिया राजनीतिक दलहरुको निर्माण । यो नै अहिलेको राष्ट्रिय आवश्यक्ता हो । त्यसले मात्रै विकास र समृद्धिको नेतृत्व गर्नसक्दछ । हो, निरंकुशताको कालमा राजनीतिक दलहरुले आफ्ना नीतिको आधारमा राजनीति बिस्तार गर्न सक्दाखेरी धेरै पार्टीहरु अस्तित्वमा रहे । यो सच्चाई हो । तर जब विकास र समृद्धिको प्रश्न अगाडि आउँदछ । जव लोकतान्त्रिक समाज व्यवस्थाको निर्माण हुने गर्दछ । त्यसपछि धेरै राजनीतिक दलहरु होइन, बलिया राजनीतिक दलहरुको आवश्यक्ता पर्दछ भन्ने सच्याईलाई हामीले जनताका बीचमा लिएर जान सक्नुपर्दछ । त्यसले मात्रै मुलुकको विकास र समृद्धिको आधारशीला तयार गर्नसक्दछ । भन्न सक्नुपर्दछ–ठूला पार्टी भित्रै सुधार सम्भव छ । नीतिको विकल्प पनि त्यही खोज्न सकिन्छ, नेतृत्वको विकल्प पनि त्यही खोज्न सकिन्छ । त्यस अर्थमा नेपाललाई अस्थिरताको प्रयोगशाला नबनाऔं । स्थायित्वतर्फ लिएर जाऔं भन्ने कुराको अपिल गर्न सक्नुपर्दछ । ’महासचिव पोखरेलले मुलुकलाई सही ढंगले नेतृत्व दिन सक्ने पार्टी एमालेमात्रै भएको दाबी पनि गर्नुभयो ।

—न्युज एजेन्सी नेपाल

महासचिव शंकर पोखरेलराजनीतिक शक्ति

प्रकाशित मिति: आइतवार, बैशाख २, २०८१, १०:३५ बिहान

लेखक: समाचारपाटी