नेपाल धितोपत्र बोर्डका अध्यक्ष रमेशकुमार हमालले बजारलाई खुला नछोडेसम्म व्यवसाय फस्टाउन नसक्ने बताउनुभएको छ ।शुक्रवार काठमाडौंमा नबिल बैंक लिमिटेडको सहायक कम्पनी नबिल स्टक डिलर लिमिटेडको औपचारिक उद्घाटन र स्टक डिलर धितोपत्र कारोबारको शुभारम्भको अवसरमा बोल्दै उहाँले यस्तो बताउनुभएको हो । उहाँले नियामक निकायहरुको भुमिका बजारको विकासलाई दीर्घकालीन र स्थिरता दिनुपर्ने रहेको बताउनु भयो । काम गर्ने प्रणालीमा सबैले परिवर्तन गर्न आवश्यक रहेको बताउनु भयो । उहाँले गल्ती गर्छन् भनेर सरकारले कडा नीति ल्याउने हो भने व्यवसाय फस्टाउन नसक्ने बताउनु भयो ।  बजारमा कुनैपनि कुराहरु सबै लगानीकर्ता र विशेष गरी साना लगानीकर्ताको लाभमा नभए त्यस्ता नीति तत्काल परिवर्तन गर्ने पनि बताउनु भयो । उहाँले आगामी दिनमा नेप्सेले आफ्नो वेबसाइटमा लगानीकर्ताले सजिलोसँग हेर्नसक्ने गरी सम्पूर्ण तथ्यांकहरु राख्नुपर्ने बताउनु भयो ।

उहाँले भन्नुभयो, ‘बजार फैलिने क्रममा छ । बजारलाई अब हामीले हाम्रो नियामक निकायहरुको हाम्रो भुमिका भनेको बजारको विकासलाई दीर्घकालीन, सस्टेन र संस्टेनिबिलिटी दुई वटा कुरामा जोड्नुपर्नेछ । गभर्नेन्सको प्रोटोकलमा हामीले उल्लेखनीय प्रगति गरिसकेका छौँ । तर त्यसमा हामी सबैको मार्केटसँग आवद्ध भएका नियामक निकाय हामी आफैँमा पनि काम गर्ने प्रणालीमा हामीले बदलाव ल्याउनुपर्नेछ । हामीले पुरानो मानसिकतामा रह्याैँ भने अघि बढ्न सक्दैनौँ । म आएदेखि नै सरकारी सिस्टममा काम गर्ने प्रणालीमा पनि प्रणालीगत सुधारको अपेक्षा राखेको थिएँ । केही कार्यक्षेत्रमा लागू पनि भइसकेको छ । बजारमा कुनैपनि कुराहरु यदी त्यसले बजारको लगानीकर्ताको ओभरल लगानीकर्ताको स्मल इन्भेटर्सको बेनिफिटमा छैन भने त्यस्ता नीति तुरुन्तै चेन्ज गर्नसक्छौँ । त्यो विज्ञाता हामीसँग छ । आगामी दिनमा नेप्सेले आफ्नो वेबसाइटमा लगानीकर्ताले सजिलोसँग हेर्नसक्ने गरी लकिङसम्बन्धी सम्पूर्ण डिटेलहरु वेबसाइटमा अपडेट हुनुपर्छ । ३० दिनको समय र त्यो लकिन सकिएको एक हप्तासम्म पनि त्यो देखिनुपर्छ । लगानी कर्तालाई थाहा होस् की भोलि कत्रो भोलुममा कसकसको लकिन खुलेको स्टक बाहिर आउँदैछ । त्यसले मेरो प्राइजमा के प्रभाव पार्छ भन्नेकुरा लगानीकर्ताले बुझ्नुपर्छ । हाम्रो जस्तो यङ डेमोग्राफिक्स भएको देशमा राज्यको भुमिका भनेको सिक्काको दुई वटै पाटाको क्षमता हेर्नसक्ने र त्यसैअनुसारको नीति ल्याउनसक्ने र बाटो खोल्न सक्ने हो । सरकारले इकोसिस्टम बनाउने हो । अहिले मैले के क्लियर गर्न खोजिरहेको छु भने चाहे त्यो १० कित्ते नीति होस् वा १० प्रतिशतको नीति होस् । वा त्यो लकिन पिरेडेको नीति होस् वा दफा ३८ को सञ्चालकहरुको हस्तान्तरण सम्बन्धी कुरा होस्, हामीले सम्पूर्ण हाम्रो इकोनोमी र हाम्रो फाइनान्सियल इकोसिस्टमको यो देशमा यो देशको व्यवसाय जगतको विकासको लागि हो । हाम्रो प्रणालीमा हामीले व्यवसाय कसरी फैलिन्छ भन्ने कुराको कोर बुझेको छैन जस्तो लाग्छ । हामीले जति फ्रिडम दिनसक्छौँ व्यवसाय त्यति नै राम्रो हुने हो । हाम्रो काम भनेको बजारलाई स्याकल गर्ने होइन । बजारलाई खुला छोड्ने हो तर गल्ती गर्नेलाई ठाउँको ठाउँ कारबाही गर्ने हो । तर गल्ती गर्छ भनेर अनुमानमा सरकारले कडा नीति ल्यायो भने व्यवसाय फस्टाउँदैन ।’अध्यक्ष हमालले अर्थतन्त्र र व्यवसायको हीतको लागि नीतिहरु केन्द्रित हुनुपर्ने बताउनु भयो । 

नेपाल धितोपत्र बोर्डरमेशकुमार हमाल

प्रकाशित मिति: शनिबार, मंसिर ३०, २०८०, ९:३४ बिहान

लेखक: समाचारपाटी