प्रतिनिधि सभा अन्तर्राष्ट्रिय सम्बन्ध र पर्यटन समितिका सभापति राजकिशोर यादवले भारतले नेपालसँग अझ राम्रो सम्बन्ध बनाएर जान चाहेको बताउनुभएको छ । 

शुक्रबार भारत भ्रमण सम्बन्धि प्रतिवेदन समितिको बैठकमा प्रश्तुत गर्दै उहाँले भारतीयहरुले नेपाललाई हेर्ने दृष्टिकोणमै बदलाव आएको दाबी समेत गर्नुभयो । सभापति यादवले भारतले अर्थतन्त्रमा विश्वलाई नै नेतृत्व गर्ने लक्ष्य लिएको र त्यसका लागि भारत सरकार र त्यहाँका सांसदहरुले नेपालसँग अझै बलियो सम्बन्ध बनाएर जान चाहेको पनि आफूहरुसँगको छलफलमा बताएको उल्लेख गर्नुभयो । सभापति यादवकाअनुसार भारतीय नेता र सांसदहरुले नेपाल एउटा इमान्दार मित्र भएकाले पनि सम्बन्धमा गाढापन ल्याउनुपर्ने बताएका थिए । भारतीय सांसदहरुले आफूहरुसँगको भेटमा नेपालको समृद्धि आफूहरुको चाहना रहेको पनि बताउनुभएको पनि सभापति यादवको भनाई थियो । उहाँले आफूहरुले पनि भारतीय नेता तथा सांसदहरुसँगको भटमा नेपालको शिर ठूलो हुनेगरी प्रश्तुती दिएको दाबी समेत गर्नुभयो । 

उहाँले भन्नुभयो, ‘भारतको इकोनोमी र्यापिडली ग्रो भएको अवस्था हो । यो निर्माणमा नेपालीहरुको पनि भुमिका छ । त्यसैले हामीले तिमीहरुको यो विकासबाट नेपालीले लाभ पाउनुपर्छ । यो हाम्रो हक हो । त्यो मान्यता हामीले स्थापित गर्यौं । त्यहाँ हामीले नेपालको पक्षबाट मलाई छ, त्यहाँ हामीले नेपालको नाक उचो राख्नेगरी हामीले प्रश्तुती गर्यौं । र त्यो कुरामा उनीहरुले पनि के पाए भने उनीहरुको यो पछिल्लो अवस्थामा हामीले जे भारत बुझिरहेका छाैँ, त्यो रहेनछ । भारत अब दुनियाँलाई लिड गर्छौं भन्ने मनोविज्ञानबाट र त्यसको लागि हामी नेपालसँग एकदम सुमधुर सम्बन्ध, नेपालका सार्वभौमिकता, नेपालको सम्मानलाई हामीले सम्मान गर्दै अब हामीलाई यो सानोतिनो कुरामा अल्झिनु छैन । हामी चाहीँ एक प्रकारको ग्लोबल एरिनामा लिड गर्नेतर्फ गईसकेका छौं । भारतले नेपालको समृद्धि चाहेको छ । नेपालको हित चाहेको छ । यदी कहीँकेही छ भने हाम्रो इन्गेजमेण्ट बढाऔं । संवादको माध्यामबाट समाधान गरौं । हामीहरुले तपाईहरुले लगाएको गुणको उच्च मूल्यांकन गर्छौं भन्ने त्यहाँको प्रश्तुती रह्यो । र त्यहाँ हामीलाई हिनताबोध गर्नुपर्ने वा हामी कमजोर छौं भन्नुपर्ने कुनै कारणबाट, एङ्गलबाट हामीलाई त्यो अनुभूति भएन । मलाई त अब साथीहरुले पनि भन्नुहुन्छ–बरु हामीले अलिकति लिड गरे जस्तो लाग्छ त्यहाँ । हामी आफ्नो हात माथि राखेर प्रश्तुती रह्यो । र, उहाँहरुले त्यो कुरालाई सहजै स्वीकार पनि गर्नुभयो । भारतको संसद टेक्नोलोजीमा धेरै अगाडि भइसक्यो । पेपरलेस भइसक्यो । त्यहाँको भोटिङ सिस्टम त्यही सिटमा राखिएको प्रविधिबाट हुन्छ । अर्को उनीहरु एक स्वरले नेपाललाई हामी धेरै माया गर्छौं । नेपालसँग हामी राम्रो सम्बन्ध बनाएर जान चाहन्छौं । त्यहाँका सांसदहरुले यतिसम्म भने कि नेपाल भनेको हाम्रो विश्वास हो । नेपाल भनेको हाम्रो लागि इमान्दार पार्टनर हो । हामी त्यही अनुसार अघि बढ्न चाहन्छौं ।’

सभापति यादव नेतृत्वको संसदीय समितिको टोलीले गत माघ १६ गतेदेखि माघ २४ गतेसम्म भारत भ्रमण गरेको थियो । भ्रमणका क्रममा सो टोलीले भारतीय लोकसभाका सभामुख ओम विरला, विदेशमन्त्री एस जयशंकर, भारतीय संसद अन्तर्गतको विदेश मामिलासम्बन्धि संसदीय समितिका सांसदहरुलगायतकासँग भेट गरी द्विपक्षीय हितका विविध विषयमा छलफल गरेको थियो ।

—न्युज एजेन्सी नेपाल

भारतराजकिशोर यादव

प्रकाशित मिति: शुक्रबार, माघ २६, २०८०, ५:४२ बेलुका

लेखक: समाचारपाटी