काठमाडौं I चितवन प्रहरीले राष्ट्रिय स्वतन्त्र पार्टीका सभापति रवि लामिछानेलाई पोखरा लैजाँदा कुनै दुर्व्यवहार नभएको स्पष्ट पारेको छ। चितवन प्रहरीका प्रवक्ता डीएसपी भेषराज रिजालले विज्ञप्ति जारी गर्दै रवि लामिछाने र रास्वपाका आरोपहरूलाई अस्वीकार गर्दै भ्रम नफैलाउन आग्रह गरेका छन्।

प्रहरीका अनुसार बुधवार राति लामिछानेलाई बयानपछि हिरासत कक्षमा नलगेर भेटघाट कक्षमा राखिएको थियो। उनी राति १२:०५ बजे चितवनबाट पोखरातर्फ लैजाने निर्णय सुरक्षाजन्य कारणले गरिएको थियो।

विज्ञप्तिमा भनिएको छ, बयानका क्रममा भीडले ढुंगामुढा प्रहार गर्ने, प्रहरी कार्यालयमा जबर्जस्ती प्रवेश गर्ने प्रयास गरेकाले सुरक्षाको चुनौती बढेको थियो। हवाई उडान मौसमका कारण असम्भव भएपछि तत्काल पोखरा लैजानुपर्ने अवस्था सिर्जना भएको प्रहरीले जनाएको छ।

पोखरा लैजाँदा प्रहरी कर्मचारीले दुर्व्यवहार गरेको, राति सुतेको बेलामा जबर्जस्ती उठाएको, अस्वस्थताका बाबजुद लगेको र प्रहरी कर्मचारीले रक्सी सेवन गरेको भन्ने आरोप भ्रामक र झुटो रहेको चितवन प्रहरीले दाबी गरेको छ।

यसैबीच, रास्वपाले लामिछानेलाई पोखरा लैजाँदा मानव अधिकार हनन भएको भन्दै राष्ट्रिय मानव अधिकार आयोगमा उजुरी दिएको छ। आयोगले घटनाको विषयमा अनुसन्धान गर्ने तयारी गरेको छ।

चितवन प्रहरीरवि लामिछाने

प्रकाशित मिति: सोमवार, मंसिर २४, २०८१, १०:३२ बिहान

लेखक: समाचारपाटी