काठमाडौं I राष्ट्रिय स्वतन्त्र पार्टी (रास्वपा) का सभापति रवि लामिछानेलाई थप चार दिन हिरासतमा राख्न अदालतले अनुमति दिएको छ। पोखराको सूर्यदर्शन सहकारी ठगी प्रकरणमा मंगलबार कास्की जिल्ला अदालतले अनुसन्धानका लागि ४ दिनको थप म्याद दिएको हो।

कास्की जिल्ला अदालतका श्रेस्तेदार राजन खनालका अनुसार प्रहरीले लामिछानेसहित अन्य तीन जनालाई म्याद थपका लागि अदालतमा उपस्थित गराएको थियो। म्याद थप गरिएका अन्य व्यक्तिहरूमा गोर्खा मिडियाका पूर्व उपाध्यक्ष छविलाल जोशी, नेचर हर्ब्सका सञ्चालक रामबहादुर खनाल, र जीबी राईका सहयोगी लिला पछाईं रहेका छन्।

सुर्यदर्शन सहकारी ठगी प्रकरणमा प्रहरीले ८४ दिनको अनुसन्धानपछि सोमबार जिल्ला सरकारी वकिलको कार्यालयमा प्रतिवेदन बुझाएको थियो। उक्त प्रतिवेदनमा लामिछानेसहित ५१ जनालाई प्रतिवादी बनाइएको छ, जसमा ३७ जना फरार छन्। प्रहरीको रायअनुसार प्रतिवादीहरूविरुद्ध १ अर्ब ५१ करोड बिगो माग दाबी गर्नुपर्नेछ।

यसअघि प्रहरीले थप प्रमाण संकलन गर्न भन्दै अदालतसँग चार दिनको म्याद माग गरेको थियो। अदालतले उक्त मागलाई स्वीकार गर्दै थप अनुसन्धानका लागि अनुमति दिएको हो।

रवि लामिछाने

प्रकाशित मिति: मङ्लबार, पुस २, २०८१, ३:०५ बेलुका

लेखक: समाचारपाटी