काठमाडौं । राष्ट्रिय स्वतन्त्र पार्टीका सभापति रवि लामिछानेले भ्रष्टाचार नियन्त्रण आफ्नो पार्टीको लक्ष्य रहेको बताउनु भएको छ । शनिवार आज काठमाडौं मा आयोजित एक कार्यक्रममा उहाँले सबै भ्रष्टाचारीहरुलाई कारबाहीको दायरमा ल्याउनु पार्टीको उद्देश्य भएको बताउनु भएको हो ।

साथै, उहाँले पार्टीलाई दुई तिहाइमा लैजानुपर्ने भएकाले अब साना कुरामा आफू नबोल्ने दाबी गर्नुभएको छ । उहाँले अब आफू सधैँ ठूला कुरामा मात्रै बोल्ने र साना कुरामा बोल्ने समय आफूसँग नरहेको बताउनु भएको हो । उहाँले साना कुराहरु पार्टीका अन्य नेताहरु बोल्ने बताउनु भयो ।

उहाँले भन्नुभयो, ‘हामी यो यात्रालाई अविरल अघि बढाउन चाहन्छौँ । नयाँ छौँ थाहा छ, सिक्ने कुरा धेरै छन् । विचार छैन भन्छन्, विचारका बारेमा कुरा पछि गरौँला । संसारकै धनी देश बन्ने देशलाई गरिब देश बनाउनेहरुलाई छानी छानी कानुनी दायरामा ल्याउने विचार छ ।’

लामिछानेले नागरिकले आफ्नो पार्टीबाट चाहेको पहिलो काम भ्रष्टाचार नियन्त्रण रहेकाले आफूहरु लक्ष्य प्राप्तिका लागि लडिरहने बताउनु भयो । उहाँले आफ्नो पार्टीमा संलग्न भ्रष्टाचारीहरुलाई पार्टीबाट निस्कासित गरी उनीहरुले जितेका निर्वाचन क्षेत्रमा चुनाव गर्ने व्यवस्था गर्न चुनौती समेत दिनुभयो ।

रवि लामिछाने

प्रकाशित मिति: शनिबार, असार २, २०८०, ८:१४ बेलुका

लेखक: समाचारपाटी