धनगढी । धनगढी उपमहानगरपालिका -४ मा रहेको नेपाली कांग्रेस सभापति शेरबहादुर देउवाको निवास अगाडि राखिएको शंकास्पद वस्तु नेपाली सेनाको बम डिस्पोजल टोलीले निस्क्रिय पारेको छ । शनिबार राति ड्युटीमा रहेको प्रहरीले देउवाको निवासको बाहिरपट्टीको सडकमा कालो झोलामा तार देखिने गरि शंकास्पद वस्तु देखेको थियो ।

त्यसपछि नेपाली सेनाको बम डिस्पोजल टोली एकाबिहानै घटनास्थल पुगेको थियो । केही बेरअघि गरिएको डिस्पोजलमा इलेक्ट्रिक केतली भित्र बालुवा हालेको र त्यो बालुवाभित्र पनि सानो टिफीनको बक्सा जस्तो देखिने वस्तु राखिएको फेला परेको हो ।

नेपाली सेनाको टोलीले उक्त वस्तु निस्क्रिय पारेको हो । त्यसमा विस्फोटक रहे नरहेको प्राविधिक परीक्षण पछि मात्रै थाहा हुने प्रहरीले जनाएको छ । देउवाको उक्त निवास सुदूरपश्चिमका पूर्वभौतिक पूर्वाधार विकास मन्त्री प्रकाशबहादुर देउवाले आफ्नो निवासको रुपमा प्रयोग गरिरहेका थिए ।

शंकास्पद वस्तुशेरबहादुर देउवा

प्रकाशित मिति: आइतवार, भदौ ९, २०८१, १०:२८ बिहान

लेखक: समाचारपाटी