काठमाडौं । पूर्व प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहाल प्रचण्डले एमालेसँग सहकार्य गरेर चुनाव लड्ने कुनै सम्भावना नरहेको बताउनुभएकाे छ। शनिबार दाङको घोराहीमा भएको पत्रकार भेटघाट कार्यक्रममा बोल्दै अध्यक्ष प्रचण्डले अब एमालेसँग सहकार्य गरेर चुनाव लड्ने कुनै सम्भावना नरहेको स्पष्ट पार्नुभएकाे हाे। उहाँले एमालेसँगको एकता त्यसपछिको सहकार्य धेरै दिन टिक्न नसकेको जनाउनुभएकाे हाे।
उहाँले ८४ को निर्वाचन माओवादीले आफ्नै शक्तिको बलमा लड्ने निर्णय पार्टीलेसमेत गरिसकेको उल्लेख गर्नुभयाे। प्रचण्डले अब माओवादीका धेरै कमिकमजोरीलाई सुधार गर्दै जनताको विश्वास जित्ने गरी अघि बढ्ने उल्लेख गर्नुभयाे।
उहाँले बिचौलियाहरुको सेटिङ् भत्काउन खोज्दा चलखेल गरेर असंवैधानिक रूपमा संख्याको बलमा आफूलाई हटाउने खेल भएको दोहर्याउनुभयाे। अध्यादेशबाट शासन गर्ने गलत परम्परा देखिएपछि विपक्षीहरू एक भएर सदन बोलाउन दवाव दिएकै कारण सरकारले सदन आह्वान गरेको उहाँको भनाइ छ ।
प्रचण्डले अब विपक्षीहरू सामूहिक रूपमा अघि बढ्ने र समाजवादी मोर्चालाईसमेत सक्रिय बनाउने धारणा राख्नुभयाे।