नेकपा (माओवादी केन्द्र) का अध्यक्ष पुष्पकमल दाहालले क्रान्तिकारी कम्युनिस्टहरूलाई एकता गर्ने प्रयासबाट नथाकेको बताउनुभएको छ ।

मंगलवार काठमाडौंमा आयोजित नेपाल कम्युनिस्ट पार्टीको ७७ औँ स्थापना दिवस तथा १५६ औँ लेनिन जयन्तीको अवसरमा उहाँले यस्तो बताउनुभएको हो । उहाँले आफूहरू क्रान्तिकारी कम्युनिस्टहरूलाई एकता गर्ने प्रयासबाट नआत्तिएको बताउँदै कम्युनिस्ट आन्दोलनको एकताको झन्डा बोक्न नछाडेको बताउनु भयो । उहाँले क्रान्तिकारी कम्युनिस्टहरूलाई एकतावद्ध बनाउने कुरामा विमुख नभएको समेत स्पष्ट पार्नुभयो । उहाँले नेपालको कम्युनिस्ट आन्दोलनलाई सिङ्गै एकता गर्ने उद्देश्यले प्रयास गरिए पनि सफल हुन नसकेको बताउँदै सबै क्रान्तिकारी कम्युनिस्टहरूलाई छलफलमा आउन आग्रह गर्नुभयो । उहाँले छलफल र बहस गरी सही विचारको आधारमा एकीकृत र केन्द्रिकृत भएर देशमा समाजवादी क्रान्तिको यात्रा अगाडी बढाउने सङ्कल्प गर्न कम्युनिस्ट पार्टीहरूलाई आह्वान समेत गर्नुभयो ।  

अध्यक्ष दाहालले भन्नुभयो, “क्रान्तिकारी कम्युनिस्टहरूलाई एकतावद्ध बनाउने कुरामा विल्कुल विमुख भएका छैनौँ । म सबै क्रान्तिकारी कम्युनिस्टहरूलाई जो जो, जहाँ जहाँ भएपनि सबैलाई गम्भीरताका साथ, जिम्मेवारीपूर्वक र निष्ठाका साथ म अपिल गर्न चाहन्छु, आउनुहोस् बसेर छलफल गरौँ, बहस गरौँ र एउटा सही विचारको आधारमा एकीकृत र केन्द्रिकृत भएर देशमा समाजवादी क्रान्तिको यात्रा अगाडी सङ्कल्प गरौँ ।  हामी सबै सोचौँ । हामीले यस सन्दर्भमा केही प्रयोगहरू गर्यौं, असफल भयौँ । हाम्रो पार्टी नै थियो, जसले नेपालको कम्युनिस्ट आन्दोलनलाई सिङ्गै एकता गरौँ भन्ने उद्देश्यका साथ निर्वाचनमा सँगै जाने र पार्टी एकता गर्ने प्रस्ताव अगाडी सारेको । तर अवसरवादका कारण सफल हुन सकेन । हामी त्यसबाट थाकेका छैनौँ, आत्तिएका पनि छैनौँ । हामी कम्युनिस्ट आन्दोलनको एकताको झन्डा बोक्न छाडेका पनि छैनौँ, छोड्न पनि छोड्दैनौँ  । तर त्यो सच्चा कम्युनिस्टको एकता हुनुप¥यो, क्रान्तिकारी कम्युनिस्टको एकता हुनुपर्यो ।”  

अध्यक्ष दाहालले वर्तमान सरकारको जन्म अप्राकृतिक, अलोकतान्त्रिक, अपारदर्शी र असंवैधानिक रहेको आरोप दोहो¥याउनु भयो । उहाँले अहिलेको सरकार भ्रष्टाचारीको संरक्षण गर्न बनेको आरोप समेत लगाउनु भयो । उहाँले अहिलेको सरकारले राम्रो काम गर्नेलाई अपनाम र आफ्नो पक्षमा अन्धो भएर लाग्नेलाई संरक्षण गरेको बताउँदै सरकारले सरकारमा बस्ने हैसियत र औचित्य गुमाइसकेको धारणा राख्नुभयो । 
 
उहाँले भन्नुभयो, “केपी ओली नेतृत्वको सरकारको जन्म नै अप्राकृतिक, अलोकतान्त्रिक, अपारदर्शी र असंवैधानिक छ भनेका छौँ । सरकारले गर्ने भनेकै भ्रष्टाचारीको संरक्षण गर्ने हो । यसले राम्रो काम गर्नेलाई अपनाम गर्ने र आफ्नो पक्षमा अन्धो भएर लाग्नेलाई नै जसरी पनि रक्षा गर्ने काम भएको छ । आजको दिनमा एक पनि सरकारमा बस्ने हैसियत र औचित्य सरकारले गुमाइसकेको छ ।”  उहाँले अहिले देशको राजनीतिक अवस्था जटिल र चुनौतीपूर्ण स्थितिमा पुगेको समेत जिकिर गर्नुभयो ।

– न्युज एजेन्सी नेपाल

क्रान्तिकारी कम्युनिस्टपुष्पकमल दाहाल

प्रकाशित मिति: मङ्लबार, बैशाख ९, २०८२, ५:३० बेलुका

लेखक: समाचारपाटी