नेकपा (माओवादी केन्द्र) का अध्यक्ष पुष्पकमल दाहालले आफू नेतृत्वको सरकारले खोलेका भ्रष्टाचारका फाइलहरु पुनः खोल्ने बताउनुभएको छ ।

बिहीवारको प्रतिनिधि सभा बैठकमा बोल्दै उहाँले जनताको शक्ति लिएर अपराधका फाइलहरु पुनः खोल्ने बताउनुभएको हो । उहाँले लोकतन्त्रको सर्भिसिङ र सुशासन फेरि शुरु गर्ने बताउनु भयो । उहाँले विचौलिया र राजनीतिको गठजोड फेरि भत्काएर छोड्ने दाबी गर्नुभयो । उहाँले अहिलेको सरकारसँग जना खुशी नभएपनि विचौलिया र स्वार्थ समूहहरु खुशी रहेको बताउनु भयो । 

अध्यक्ष दाहालले भन्नुभयो, ‘अहिले जनता सरकारसँग दुःखी भए पनि विचौलिया र स्वार्थ समूहहरु खुशी छन् । तर, स्वार्थसमूहले बुझे हुन्छ, सरकारलाई किनेर तपाईहरुले पाएको उन्मुक्ति स्थायी हुनेछैन । तपाईहरुले कब्जा गरेका राज्यका स्रोत र संशाधन सधैंका लागि हुने छैनन् । म आज यही रोस्टमबाट चुनौतीका साथ भन्छु– यी फाइलहरु फेरि खोलिनेछन् । जनताको शक्ति लिएर हामी फेरि खोल्नेछौं यी अपराधका फाइल । फेरि शुरु गर्नेछौं लोकतन्त्रको सर्भिसिङ र सुशासन । फेरि भत्काउनेछौं, विचौलिया र राजनीतिको गठजोड ।’ उहाँले सरकारलाई किनेर पाएको उन्मुक्ति स्थायी नहुने कुरा स्वार्थ समूहले बुझ्न जरुरी रहेको बताउनु भयो ।

—न्युज एजेन्सी नेपाल

प्रकाशित मिति: बिहिबार, माघ २४, २०८१, ४:३९ बेलुका

लेखक: समाचारपाटी