काठमाडौं । बैंकहरूको निष्क्रिय कर्जा बढ्दा नाफामा कमी आएको छ । चालू आर्थिक वर्षको दोस्रो त्रैमास अर्थात् ६ महिनाको रिपोर्टअनुसार बैंकहरूको नाफामा कमी देखिएको हो ।
निष्क्रिय कर्जा बढेको, सम्भावित कर्जा नोक्सानी व्यवस्थाका लागि छुट्याएको रकम बढेको र अधिक तरलताका कारण नाफा प्रभावित बनेको वाणिज्य बैंकहरूले जनाएका छन् ।
आज २० वटा वाणिज्य बैंकहरूले प्रकाशन गरेको रिपोर्टअनुसार अघिल्लो आर्थिक वर्षको ६ महिनाको तुलनामा यो वर्षको ६ महिनामा नाफा ४ दशमलव ३६ प्रतिशतले घटेको छ । गएको आर्थिक वर्षको ६ महिनामा २० वटा वाणिज्य बैंकले २८ अर्ब ६८ करोड ८३ लाख नाफा कमाएकोमा यो आर्थिक वर्षको ६ महिनामा २७ अर्ब ४३ करोड ७० लाख रुपैयाँ नाफा कमाएका छन् ।
रिपोर्टअनुसार २० मध्ये ११ वटा बैंकको नाफा सामान्य बढेको छ भने ९ वटा वाणिज्य बैंकको नाफा घटेको छ । नबिल बैंकको नाफा सबैभन्दा धेरै बढेको छ भने एनआईसी एशिया बैंकको नाफा सबैभन्दा धेरै घटेको छ । सबैभन्दा धेरै नाफा कमाउने सूचीको दोस्रो नम्बरमा ग्लोबल आईएमई, तेस्रोमा इन्भेस्टमेन्ट मेगा बैंक, चौथोमा एभरेस्ट र पाँचौं नम्बरमा एनएमबी बैंक रहेका छन् ।