काठमाडौं । प्रधानमन्त्री पुष्पकमल दाहाल 'प्रचण्ड'ले प्रतिक्रियावादीको घेराबन्दी तोडेर आफू प्रधानमन्त्री बनेको बताउनुभएकाे छ । बुधबार वाईसियलको केन्द्रीय कमिटी बैठकलाई सम्बोधन गर्दै प्रधानमन्त्री प्रचण्डले आफू सजिलै प्रधानमन्त्री नबनेको बताउनुभएकाे हाे।
''प्रतिक्रियावादीका धेरै घेराबन्दीहरुलाई तोडेर यहाँ आइपुगेको हो। सजिलैसित आएको होइन,'उहाँले भन्नुभयाे ,'हामीले विगतमा जसरी घेरा तोड्ने र प्रतिरोध गर्ने रणनीतिक बनाउँथ्यौं । आज पनि घेरा तोड्ने र प्रतिरोध गर्ने प्रक्रियाबाटै यो सफलता प्राप्त भएको हो।'
प्रधानमन्त्री प्रचण्डले यो अवसरलाई त्यतिकै खेर जान नदिने बताउनुभयाे। त्यसका लागि सरकार र पार्टीलाई सबैको सहयोग आवश्यक रहेको औंल्याउनुभयाे। यो पटक सरकार सफल हुने र पार्टी सफल हुने कुरा सिंगै राष्ट्र र इतिहासका लागि अविष्मरणी परिघटना हुने उहाँको भनाइ छ।
प्रचण्डले पार्टी र सरकारलाई सफल बनाउन वाईसीएलको संस्थागत पहलकदमी आवश्यक भएको र संगठन विस्तार गरेर पार्टीलाई सुदृढ बनाउन कार्यकर्तालाई निर्देशन दिनुभयाे।
उहाँले भन्नुभयाे,'यो अवसरलाई वाईसियललाई बलियो बनाउने कुरामा सदुपयोग गर्नुछ। सुशासन दिएर भ्रष्टाचार नियन्त्रण गर्ने कुरालाई कठोर रुपमा अगाडि बढाएर सम्बोधन गर्नुछ।'
प्रचण्डले वाईसियल युवापंक्तिलाई आकांक्षसहित अगाडि बढ्न आग्रह गर्नुभयाे। उहाँले सरकार र पार्टीलाई सफल पार्न सबै एक ढिक्का भएर लाग्नुपर्ने बताउनुभयाे। उहाँले भन्नुभयाे, 'पार्टीले गर्नुपर्ने सहयोग र सरकारले गर्ने सहयोग रहन्छ। आकांक्षसहित अगाडी बढ्नु होस । भविष्य उज्ज्वल छ।'