प्रधानमन्त्री केपी शर्मा ओलीले वर्तमान सरकारले पार्टी फुटाउने कुरामा जोड नदिएको बताउनुभएको छ । शुक्रवारको प्रतिनिधि सभालाई सम्बोधन गर्दै उहाँले यस्तो बताउनुभएको हो । उहाँले काँग्रेस—एमाले सहितको बलियो सरकारको प्राथमिकता पार्टी फुटाउने नरहेको बताउनु भयो । उहाँले सरकार ढल्छ भन्नेकुरा गरेर विपक्षीहरुले आफ्नो समय खेर फालिरहेको भन्दै व्यर्थमा समय खेर नफाल्न आग्रह गर्नुभयो । ‘ढलें–ढलें, ढलें–ढलें म त...’ जस्ता गीत मनोरञ्जन पार्टी÷उत्सवहरुमा सुहाए पनि राजनीतिमा नसुहाउने उहाँको टिप्पणी थियो । सरकार बनाउने र हटाउने थलो सदन नै भएकाले दिनरात यस्ता हल्ला गरेर आगामी तीन वर्ष बिताउनु जनताका लागि राम्रो नभएको बताउनु भयो । 

उहाँले भन्नुभयो, ‘कतिपय साथीहरुबाट मैले ‘बच्चाको जस्तो स्वभाव’ भन्ने टिप्पणी पनि सुन्ने गरेको छु । वच्चा होस् वा पाका, कसैलाई पनि डर देखाउनु हुँदैन भन्ने म ठान्छु । आफैं डराउनेलाई दिन मिल्ने जवाफ चाहीँ मसँग छैन । बरु तिनीहरु आफ्नै कर्मको भयपासमा पो परेका हुन् कि भन्ने लाग्छ । आज यत्ति चाहीँ भन्छु– पार्टी टुक्राउने, भत्काउने जस्ता खुद्रे कुराहरु यो सरकारको मेन्युमा छैन । ढुक्क हुनुस्–काँग्रेस एमाले सहितको यति बलियो सरकारको प्राथमकिता त्यस्तो हुन सक्दैन । विपक्षमा रहेका साथीहरुले एउटा कुरामा आफ्नो समय व्यर्थै खेर फालेजस्तो लागिरहेको छ– ‘सरकार ढल्छ । ढल्नै लाग्यो । पुस मसान्त, माघे संक्रान्ति काट्दैन ।’ आदि इत्यादि । ‘ढलें–ढलें, ढलें–ढलें म त...’ यो ‘गीत’ अति नै गाइयो । यो ‘गीत’ मनोरञ्जन पार्टी÷उत्सवहरुमा सुहाउला, राजनीतिमा सुहाउँदैन । अझ एकजना माननीयले कतै यस गीतलाई श्लील भएन समेत भन्नु भएको सुनेको छु । यस्तो गायन मनोरञ्जनका मञ्चमा गाउनु राम्रो हुन्छ, राजनीतिका मञ्चमा गाउन बन्द गरौं । सरकार बनाउने र हटाउने थलो यही सम्मानित सदन हो, अन्त कतै होइन । दिनरातै यस्ता हल्ला गरेर आगामी तीन वर्ष विताउनु जनताका लागि के फाइदा ? देशका लागि के फाइदा ? बरु दैलेखमा उत्खनन् सफल भएको इन्धनको कुरा गर्नुस्, नागढुङ्गाको सुरुङमा कहिले यातायात चल्छ भन्ने प्रश्न गर्नुस्, भर्खरै ब्रेक थ्रु भएको किमाथांका–जोगवनी सडकले चीन र भारत जोडिंदा के फाइदा हुन्छ, त्यसको कुरा गर्नुस् । सरकारको म्युजिकल चेयर गेम भन्दा त जनताको जीवनमा त्यसले पो अर्थ राख्ला कि !’  
प्रधानमन्त्री ओलीले सरकारको म्युजिकल चेयर गेम भन्दा जनताको जीवनका कुराहरुले बढी अर्थ राख्ने बताउनु भयो ।

—न्युज एजेन्सी नेपाल

प्रतिनिधि सभा

प्रकाशित मिति: शुक्रबार, माघ १८, २०८१, ३:४८ बेलुका

लेखक: समाचारपाटी