बैंकक I प्रधानमन्त्री केपी शर्मा ओलीले थाइल्यान्डका व्यवसायीहरूसँग आज बैंककमा भेटवार्ता गर्दै नेपालमा लगानीका लागि आग्रह गर्नुभएको छ। औपचारिक भ्रमणमा रहनु भएका प्रधानमन्त्री ओलीले नेपाललाई लगानीमैत्री गन्तव्यका रूपमा प्रस्तुत गर्दै थाई व्यवसायीहरूलाई अवसरको फाइदा उठाउन आह्वान गर्नुभएको हो।

भेटवार्तामा नेपाली व्यवसायी प्रतिनिधिमण्डलसमेत सहभागी रहेको थियो। प्रधानमन्त्री ओलीले नेपालमा आवश्यक कानुनी सुधार गरी लगानी सुरक्षाको प्रत्याभूति गरिएको उल्लेख गर्दै निजी क्षेत्रसँग सहकार्य गर्न सकिने बताउनुभयो।

नेपाल उद्योग वाणिज्य महासंघका अध्यक्ष चन्द्रप्रसाद ढकालले नेपालमा लगानीमैत्री वातावरण निर्माण भइसकेको, विदेशी मुद्रा सञ्चिति राम्रो रहेको तथा भारत र चीन जस्ता ठूला बजारको लाभ उठाउन सकिने जानकारी गराउनुभयो। उहाँले पर्यटन, ऊर्जा, कृषि, सूचना प्रविधि तथा निर्माणजन्य उद्योगमा लगानीका सम्भावना रहेको बताउनुभयो।

प्रधानमन्त्री ओली बिमस्टेकको छैटौं शिखर सम्मेलनमा सहभागी हुन चैत १९ गतेदेखि २३ गतेसम्म बैंककमा रहनु भएको छ। नेपाल र थाइल्यान्डबीच बुधबार मात्र दुई वटा सरकारी तथा छ वटा गैरसरकारी सम्झौतामा हस्ताक्षर भएको छ।

प्रकाशित मिति: बिहिबार, चैत्र २०, २०८१, ७:०८ बेलुका

लेखक: समाचारपाटी