काठमाडौं I नेपाल उद्योग वाणिज्य महासंघका अध्यक्ष चन्द्रप्रसाद ढकालले पर्यटनको विकासका लागि पर्यटकीय पूर्वाधारको विकास आवश्यक भएको बताउनुभएको छ। “ग्रामिण पर्यटन प्रवद्र्धनका लागि सिक्लेस महोत्सव”को नारा सहित कास्की जिल्लाको म्याग्दी गाउँपालिका-१ स्थित सिक्लेस गाउँमा आयोजित माघे सङ्क्रान्ति मेला–२०८१ तथा सिक्लेस युवा क्लबको ३० औं वार्षिकोत्सव समारोहमा बोल्दै उहाँले आर्थिक विकासका लागि पर्यटन क्षेत्र महत्वपूर्ण भएको धारणा राख्नुभयो।
नेपालमा पर्यटनको अथाह सम्भावना रहेको बताउँदै उहाँले पर्यटनबाट देशको समग्र अर्थतन्त्र चलायमान बनाउन, रोजगारी सिर्जना गर्दै आर्थिक विकास गर्न सकिने बताउनुभयो। उहाँले सिक्लेसमा नयाँ केवलकार निर्माणको चरणमा रहेको र केवलकार निर्माणसँगै त्यस क्षेत्रको पर्यटनमा नयाँ आयाम थपिने पनि जानकारी दिनुभयो।
“सिक्लेस एउटा आकर्षक पर्यटकीय गन्तव्यका रूपमा देश तथा विदेशमा प्रख्यात छ। केवलकार निर्माणले सिक्लेसमा नयाँ पर्यटकीय पूर्वाधार थप्नेछ र यसले क्षेत्रको आर्थिक, सामाजिक, र सांस्कृतिक विकासमा उल्लेखनीय योगदान पुर्याउनेछ,” उहाँले भन्नुभयो। उहाँले सिक्लेसदेखि कोरीसम्म बन्ने केवलकारको प्रक्रियागत कामहरू सकिएको जानकारी दिँदै, यसको निर्माणले क्षेत्रको सामाजिक तथा आर्थिक विकासमा सकारात्मक प्रभाव पार्ने बताउनुभयो।
साथै, उहाँले पर्यटनको लागि स्थानीय कला र संस्कृतिको संरक्षण आवश्यक रहेको उल्लेख गर्दै स्थानीय युवा क्लबले निर्वाह गरेको भूमिकाको प्रशंसा गर्नुभयो। मेलाको उद्घाटन गर्दै सूचना तथा सञ्चार प्रविधि मन्त्री पृथ्वी सुब्बा गुरुङले पर्यटनलाई आर्थिक विकासको आधारको रूपमा उल्लेख गर्दै, पूर्वाधार विकास तथा अन्य सहजीकरणका लागि सरकार सधैं तयार रहेको बताउनुभयो। गुरुङ जातिको बाहुल्यता रहेको सिक्लेस गाउँ कास्कीको मादी गाउँपालिका-१ मा पर्दछ।
पर्यटकीय गाउँ सिक्लेसबाट अन्नपूर्ण र लमजुङ हिमश्रृंखला नजिकै देख्न सकिन्छ, र यो पोखराबाट करिब ४० किमिको दूरीमा अवस्थित छ।